Cobalt uchun olingan har beshta shartnomaning faqat bittasiga to‘lov amalga oshirilgan

UzAuto Motors joriy yilning 3 noyabr kuni 100 ming dona Cobalt’ni sotuvga chiqargandi. Shartnoma shartlariga muvofiq, 7 kun ichida to‘lov amalga oshirilmagan shartnomalar bekor qilindi. Kompaniyaning ma’lum qilishicha, belgilangan muddatda 20 ming 833 dona avtomobil uchun to‘lov qilingan.

«Onlayn-kontraktatsiya yakunlangandan so‘ng, kompaniyaga ko‘plab mijozlardan shartnoma tuzish bo‘yicha murojaatlar kelib tushayotgani, shuningdek, 3 noyabr kuni tuzilgan ko‘plab shartnomalarning aslida avtomobilga bo‘lgan haqiqiy ehtiyojsiz rasmiylashtirilgani inobatga olinib, UzAuto Motors AJ to‘lov muddati tugagach Cobalt avtomobillarini rasmiy dilerlar salonlarida sotishni boshlashga qaror qildi. Endi turli sabablarga ko‘ra onlayn tizim orqali avtomobil xarid qila olmagan mijozlar istalgan Chevrolet rasmiy dileridan Cobalt avtomobilini sotib olishlari mumkin», deyiladi UzAuto Motors xabarida.

Mijoz o‘zi uchun qulay dilerlik markaziga borishi, mavjud avtomobillardan tanlab olishi, qo‘shimcha jihozlarni kafolat shartlariga ziyon yetkazmagan holda bevosita dilerlik markazida o‘rnatish imkoniyatiga ega bo‘ladi. Dilerlik markazlarida sotilayotgan barcha avtomobillar UzAuto Motors AJning yagona tizimi orqali rasmiylashtiriladi. Har bir shartnomada uning haqiqiyligini tasdiqlovchi QR-kod mavjud bo‘ladi.

«2025 yil 20 noyabr holatiga ko‘ra, dilerlik tarmog‘iga 2624 dona Cobalt avtomobili yetkazilgan bo‘lib, ularning 1969 tasi sotilib, xaridorlarga topshirilgan. Bu ko‘rsatkich har kuni oshib bormoqda. Hozirda yana qariyb 6000 dona avtomobil dilerlik markazlariga yetkazilmoqda. Shuni alohida ta’kidlash kerakki, dilerlik markazlaridagi sotuvlar onlayn platforma orqali xarid qilingan avtomobillarni mijozlarga o‘z vaqtida yetkazib berish jarayoniga hech qanday ta’sir ko‘rsatmaydi», deyiladi rasmiy xabarda.