Arktikadagi dengiz muzining maydoni yillik minimumga yetdi

NASA va AQSh Milliy qor va muz ma’lumotlar markazi (NSIDC)ga ko‘ra, dengiz muzlarining umumiy hajmi 4,6 million kvadrat kilometrni tashkil etdi, bu 2008 yilgi ko‘rsatkich bilan teng hamda kuzatuvlar tarixida eng past 10-o‘rinni egalladi.

Olimlar okeanni kvadratlar tarmog‘iga bo‘lish va muz kvadrat maydonining kamida 15 foizini egallaganini yig‘ish orqali dengiz muzining darajasini hisoblaydi.

Okeanning qutblardagi muz maydonlari mavsumiy ravishda o‘zgarib turadi: muz sovuq mavsumda, dengiz suvi muzlaganda to‘planadi va issiq mavsumda eriydi. Muzning qutblarda to‘liq yo‘qolishi sodir bo‘lmaydi. Shimoliy Muz okeanida muz miqdori odatda sentabr oyida minimal darajaga yetadi. NASA hamda Milliy okean va atmosfera tadqiqotlari boshqarmasi (NOAA) olimlari 1978 yilda qutb muzlarini kuzatishni boshlaganidan beri, global isish fonida Arktikadagi dengiz muzlari darajasi kamaydi.

«Bu yil Arktikadagi dengiz muzlari darajasi yangi rekord minimumni o‘rnatmagan bo‘lsa-da, bu umumiy pasayish tendensiyasiga mos keladi», dedi NASA'ning Goddard nomidagi Kosmik markazidagi Kriosfera tadqiqot laboratoriyasi rahbari Natan Kerts. Arktikadagi eng kichik muzlik darajasi 2012 yilda qayd etilgan. Mutaxassislar buni atmosfera isishi va anomal ob-havo sharoiti bilan bog‘lamoqda. Bu yilgi muzning yillik yo‘qolishi dastlab 2012 yildagi o‘zgarishlarga o‘xshadi. Avgust oyi boshida erish sekinlashganiga qaramay, bu umumiy pasayish tendensiyasini to‘xtatish uchun yetarli emas.