Abbos: HAMAS Falastin boshqaruvida rol o‘ynamaydi

Falastin milliy ma’muriyati (FMM) rahbari Mahmud Abbos HAMAS harakatining bo‘lajak Falastin hukumatida ishtirok etishini qat’iyan rad etdi. Abbos 25 sentabr, payshanba kuni BMT Bosh assambleyasi ishtirokchilariga video-aloqa orqali murojaat qilib, «HAMAS davlat institutlarini boshqarishda hech qanday rolga ega bo‘lmaydi», dedi.

Birlashgan Millatlar Tashkiloti Bosh assambleyasining umumiy muhokamalari chog‘ida translatsiya qilingan nutqida falastinlik siyosatchi HAMAS va boshqa qurolli guruhlar qurollarini topshirishi va qonuniy hokimiyatga bo‘ysunishi kerakligini aytdi. U, shuningdek, Falastin davlatini barpo etish uchun xalqaro yordamga chaqirdi.

Falastin ma’muriyati rahbari 2023 yil 7 oktyabrda HAMASning Isroilga uyushtirgan hujumini «Falastin xalqini ifodalamaydigan harakat» deb atadi. «Biz antisemitizmni rad etamiz», dedi Abbos. Shuningdek, u G‘azo sektorida davom etayotgan urush paytida Isroil armiyasining harakatlarini qoralab, ularni «harbiy jinoyat va insoniyatga qarshi jinoyat» deb atadi.