Shahrisabz ko‘chasida avtobus Cobalt'ga borib urildi

Toshkentda Saz Le-60 rusumli avtobus ishtirokida sodir bo‘lgan yo‘l-transport hodisasi yuzasidan rasmiy ma’lumot berildi.

Foto: Videodan kadr

Kecha, 17 oktyabr kuni soat taxminan 16:35 larda «1-avtobus saroyi» filiali tasarrufidagi Saz Le-60 rusumli, 26-sonli yo‘nalish avtobusi haydovchisi Sh.O. (1987 yil tug‘ilgan, ish staji 15 yil) boshqaruvidagi avtobus YTHga uchradi.

U avtobusni Yunusobod tumani Shahrisabz ko‘chasi bo‘ylab boshqarib kelib, yo‘lning qatnov qismiga suv sepilganini hisobga olmasdan va oraliq masofani saqlamaslik oqibatida oldinda harakatlanib ketayotgan Cobalt rusumli avtomobilning orqasidan borib urib, yo‘l-transport hodisasi sodir etgan.

O‘z navbatida, Cobalt rusumli avtomobil ham to‘qnashuv natijasida oldida harakatlanib ketayotgan BYD rusumli avtomobilga urilgan.

Dastlabki ma’lumotga ko‘ra, ushbu yo‘l-transport hodisasi oqibatida tan jarohati olganlar yo‘q. Yengil avtotransport vositalari hamda avtobus texnik shikastlangan.

Mazkur yo‘l-transport hodisasi Toshkent shahar IIBB YHXB xodimlari tomonidan o‘rnatilgan tartibda rasmiylashtirilgan.