Bolgariya Budapeshtga boradigan Putinga havo koridorini ochib beradi

Bolgariya hukumati Rossiya prezidenti Vladimir Putin AQSh prezidenti Donald Tramp bilan uchrashish uchun Budapeshtga borsa, unga o‘z hududi uzra uchib o‘tishga ruxsat berishini ma’lum qildi. Bu haqda 20 oktyabr, dushanba kuni Bolgariya milliy radiosi (BNR) Bolgariya tashqi ishlar vaziri Georg Georgiyev bayonotiga tayanib xabar berdi.

«Agar tinchlikka erishish uchun sa’y-harakatlar qilinayotgan bo‘lsa va buning uchun uchrashuv zaruriy shart bo‘lsa, uni barcha mumkin bo‘lgan vositalar bilan tashkil qilish eng mantiqiy ishdir», dedi Georgiyev BNR muxbiriga.

Bu Bolgariya Putinga havo yo‘lagi taqdim etadi deganimi, deya berilgan savolga vazir: «Agar ishtirokchilardan biri kela olmasa, uchrashuv qanday o‘tkaziladi?» - degan savol bilan javob berdi.

16 oktyabr oqshomida Tramp Rossiya prezidenti Vladimir Putin bilan ikki soatlik telefon muloqoti o‘tkazdi. Suhbatdan so‘ng u Budapeshtda Putin bilan uchrashishga rozi bo‘lganini ma’lum qildi.

Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallas Putinning Vengriyaga Ukrainadagi urushni muhokama qilish uchun kelishi mumkinligini «yoqimsiz» deb atadi. «Yo‘q, Xalqaro jinoiy sud (XJS) buyrug‘iga duchor bo‘lgan odamning Yevropa davlatiga kelayotganini ko‘rish yoqimsiz», dedi u. Shu bilan birga, Kallas «bu qandaydir yordam beradimi, degan savol tug‘iladi», deb qo‘shimcha qildi.