AQSh FZT asosiy stavkani ketma-ket ikkinchi marta pasaytirdi

Federal rezerv tizimi olti hafta ichida ikkinchi marta federal fondlar bo‘yicha foiz stavkasini pasaytirdi. Ochiq bozor operatsiyalari bo‘yicha qo‘mita (FOMC) yig‘ilishi yakunlariga bag‘ishlangan, 29 oktyabr kuni e’lon qilingan press-relizda aytilishicha, hisob stavkasi 25 bazaviy punktga kamaytirildi va hozir 3,75–4,0 foiz diapazonida.

FZTning qayd etishicha, so‘nggi oylarda AQSh mehnat bozoridagi xatarlar ortib bormoqda: iqtisodiy faollik o‘rtacha sur’atlarda o‘smoqda, bandlik o‘sishi sekinlashgan, ishsizlik darajasi ko‘tarilgan, inflatsiya esa jadallashgan va “biroz yuqori” darajada saqlanib turibdi.

AFP agentligi ta’kidlashicha, avgust oyida vaziyat prezident Donald Tramp amalga oshirayotgan boj siyosatiga oid noaniqlik fonida yanada yomonlashdi. AQShda hukumat ishining qisman to‘xtashi (shutdown) tufayli regulyator inobatga oladigan muhim iqtisodiy ko‘rsatkichlar e’lon qilinmayapti.

Bundan oldin Donald Tramp ipoteka kreditlarini yanada haqqoniy qilish uchun stavkalarni sezilarli darajada tushirishni bir necha bor talab qilgan.

FOMC'ning oldingi — 17 sentabr kuni bo‘lib o‘tgan yig‘ilishida 2025 yilda ilk marotaba stavka 4,25–4,5 foizdan 4–4,25 foizga tushirilgan edi. Ungacha u beshta yig‘ilish davomida o‘zgarmagan. AQSh regulyatorining navbatdagi yig‘ilishi 9–10 dekabr kunlari o‘tkaziladi.