Rigada Istanbul konvensiyasidan chiqishga qarshi miting bo‘lib o‘tdi

Latviya Seymi (parlamenti) binosi oldida 29 oktyabr kuni kechqurun Istanbul konvensiyasidan chiqish rejalariga qarshi norozilik mitingi o‘tkazildi. Latviya politsiyasi xabar berishicha, aksiyada taxminan 5000 kishi qatnashgan.

Miting hodisalarsiz o‘tdi. Plakatlarda oilaviy zo‘ravonlikka qarshi shiorlar, shuningdek, deputatlarni populizmda va “tajovuzkorlarni himoya qilish” bo‘yicha ayblovlar yozilgan edi. Ayrim namoyishchilar Latviya hokimiyatini “Rossiyaga taqlid qilish”da aybladi, chunki Moskva Yevropa kengashi tomonidan ishlab chiqilgan 2011 yilgi konvensiyani imzolamagan.

Rigadagi bu aksiya so‘nggi yillarda Latviyada o‘tkazilgan eng yirik namoyishlardan biri bo‘ldi. Parlament yaqinda konvensiyadan chiqish haqidagi qonun loyihasini birinchi o‘qishda ma’qullagan edi. Hal qiluvchi, ikkinchi ovoz berish 30 oktyabr kuniga belgilangan.

Istanbul konvensiyasidan chiqishni, jumladan, “Yashillar va dehqonlar ittifoqi”, shuningdek, ushbu partiyadan nomzod sifatida saylovda qatnashgan vazir Reynis Uzulniyeks qo‘llab-quvvatlamoqda. Uning aytishicha, ushbu hujjat “jamiyatni bo‘luvchi ramz”ga aylangan, oilaviy zo‘ravonlikka qarshi esa mamlakat ichida qabul qilinadigan me’yoriy hujjatlar orqali kurashish mumkin.

Istanbul konvensiyasi ayollarga nisbatan zo‘ravonlikni inson huquqlarini buzish sifatida tasniflaydi. Hujjatni Yevropaning 38 mamlakati, shu jumladan Gurjiston ham ratifikatsiya qilgan.

Konvensiya tanqidchilari Latviyada uni an’anaviy oilaviy qadriyatlarga zid, deb hisoblamoqda. Masalan, ayrimlar hujjatda “gender” tushunchasiga berilgan ta’rifni tanqid qiladi.

Agar qonun loyihasi qabul qilinsa, Latviya Istanbul konvensiyasidan chiqadigan birinchi YeI davlatiga aylanadi. Ilgari bunday qadamni Turkiya qo‘ygan. Shu bilan birga, Bolgariya, Vengriya, Chexiya, Litva, Slovakiya va Armaniston hujjatni imzolagan, ammo haligacha ratifikatsiya qilmagan.