Ригада Истанбул конвенциясидан чиқишга қарши митинг бўлиб ўтди

Латвия Сейми (парламенти) биноси олдида 29 октябр куни кечқурун Истанбул конвенциясидан чиқиш режаларига қарши норозилик митинги ўтказилди. Латвия полицияси хабар беришича, акцияда тахминан 5000 киши қатнашган.

Митинг ҳодисаларсиз ўтди. Плакатларда оилавий зўравонликка қарши шиорлар, шунингдек, депутатларни популизмда ва “тажовузкорларни ҳимоя қилиш” бўйича айбловлар ёзилган эди. Айрим намойишчилар Латвия ҳокимиятини “Россияга тақлид қилиш”да айблади, чунки Москва Европа кенгаши томонидан ишлаб чиқилган 2011 йилги конвенцияни имзоламаган.

Ригадаги бу акция сўнгги йилларда Латвияда ўтказилган энг йирик намойишлардан бири бўлди. Парламент яқинда конвенциядан чиқиш ҳақидаги қонун лойиҳасини биринчи ўқишда маъқуллаган эди. Ҳал қилувчи, иккинчи овоз бериш 30 октябр кунига белгиланган.

Истанбул конвенциясидан чиқишни, жумладан, “Яшиллар ва деҳқонлар иттифоқи”, шунингдек, ушбу партиядан номзод сифатида сайловда қатнашган вазир Рейнис Узулниекс қўллаб-қувватламоқда. Унинг айтишича, ушбу ҳужжат “жамиятни бўлувчи рамз”га айланган, оилавий зўравонликка қарши эса мамлакат ичида қабул қилинадиган меъёрий ҳужжатлар орқали курашиш мумкин.

Истанбул конвенцияси аёлларга нисбатан зўравонликни инсон ҳуқуқларини бузиш сифатида таснифлайди. Ҳужжатни Европанинг 38 мамлакати, шу жумладан Гуржистон ҳам ратификация қилган.

Конвенция танқидчилари Латвияда уни анъанавий оилавий қадриятларга зид, деб ҳисобламоқда. Масалан, айримлар ҳужжатда “гендер” тушунчасига берилган таърифни танқид қилади.

Агар қонун лойиҳаси қабул қилинса, Латвия Истанбул конвенциясидан чиқадиган биринчи ЕИ давлатига айланади. Илгари бундай қадамни Туркия қўйган. Шу билан бирга, Болгария, Венгрия, Чехия, Литва, Словакия ва Арманистон ҳужжатни имзолаган, аммо ҳалигача ратификация қилмаган.