IHTTga migrantlar oqimi biroz pasaydi, ammo hali ham rekord darajada

Iqtisodiy hamkorlik va taraqqiyot tashkiloti (IHTT) davlatlariga doimiy yashash uchun kelgan migrantlar oqimi 2024 yilda uch yillik sezilarli o‘sishdan so‘ng ilk bor biroz kamaydi. Tashkilotning 3 noyabr kuni Bryusselda e’lon qilgan hisobotiga ko‘ra, o‘tgan yili IHTTning 38 davlatiga doimiy yashash uchun 6,2 million odam kelgan — bu ko‘rsatkich 2023 yildagidan 4 foiz past. Shu bilan birga, yangi doimiy migrantlar oqimi tarixiy maksimal darajada qoldi: 2019 yilga (COVID-19 pandemiyasigacha) nisbatan 15 foizga yuqori.

IHTT mamlakatlariga doimiy migratsiyaning asosiy sababi — oila bilan qayta birlashish. Shu fonda mehnat migrantlari soni 2020 yildan beri kuzatilgan barqaror o‘sishdan so‘ng 21 foizga qisqardi.

Hisobotga ko‘ra, migrantlarning yarmi besh davlat hissasiga to‘g‘ri keladi. AQSh 1,42 million kishi bilan birinchi o‘rinda, undan keyin 586 ming kishi bilan Germaniya kelyapti. Keyingi qatorda — Kanada, Buyuk Britaniya va Ispaniya.

Ayrim Yevropa mamlakatlarida migrantlar soni sezilarli qisqargan: masalan, Germaniyada 2023 yilga nisbatan doimiy migrantlar 12 foizga kamaygan. Buyuk Britaniyada bu ko‘rsatkich 2024 yilda 41 foizga tushgan, AQShda esa aksincha — 20 foizga o‘sgan.

Shu bilan birga, IHTT mamlakatlarida siyosiy boshpana so‘rovchilar soni o‘sishda davom etdi va yangi maksimumga — 3,1 million yangi arizaga yetdi. Bu 2023 yilga nisbatan 13 foiz ko‘p. Kelib chiqish mamlakatlari orasida Venesuela, Kolumbiya va Suriya peshqadam bo‘ldi.