Ozarboyjon armiyasi NATO standartlariga moslashtiriladi – Aliyev

Ilhom Aliyev bu borada Turkiya armiyasi bilan yaqindan hamkorlik qilayotganini ta’kidladi.

Foto: AP

Ozarboyjon armiyasi NATO standartlariga moslashtirilmoqda. APA xabariga ko‘ra, bu haqda Ozarboyjon prezidenti Ilhom Aliyev 6 noyabr kuni NATO delegatsiyasini qabul qilganida aytib o‘tgan.

«Davlat rahbari bu borada Turkiya armiyasi bilan yaqindan hamkorlik qilayotganini ta’kidladi. Shu munosabat bilan u mamlakat va alyans o‘rtasidagi munosabatlarni kengaytirishning roliga to‘xtalib o‘tdi», deyiladi xabarda.

Qayd qilinishicha, Ozarboyjon armiyasini modernizatsiya qilish jarayoni davom ettiriladi.

Aliyev bilan uchrashuvda Turkiya, Niderlandiya, Shimoliy Makedoniya, Gretsiya, Vengriya, Chernogoriya, Norvegiya, Slovakiya, Sloveniya, Shvetsiya, Chexiya, Portugaliya, Ispaniya, AQSh va Fransiyadan NATO vakillari ishtirok etgan.