Isroil Netanyahuni hibsga olish haqidagi Turkiya orderini «piar» deb atadi

Isroil Tashqi ishlar vaziri Gideon Saar bosh vazir Binyamin Netanyahu va Isroil hukumati va harbiy qo‘mondonligining bir necha o‘nlab yuqori martabali vakillarini hibsga olish uchun Istanbul bosh prokuraturasi tomonidan berilgan orderni tanqid qildi.

U ijtimoiy tarmoqdagi postida bu qadamni Turkiya prezidenti Rajab Toyyib Erdo‘g‘anning «navbatdagi piar-yurishi» deb atadi.

Saar Turkiyada prokuraturasi yaqinda Istanbul merini «faqat Erdo‘g‘anga qarshi chiqishga jur’at etgani uchun» hibsga olishni tashkil qilganini eslatdi.

«Erdo‘g‘anning Turkiyasida sud tizimi uzoq vaqtdan beri siyosiy raqiblarni bostirish, jurnalistlar, sudyalar va merlarni hibsga olish vositasiga aylangan. Isroil zolim Erdo‘g‘anning so‘nggi piar-yurishini qat’iyat va nafrat bilan rad etadi», deb yozdi Saar.

7 noyabr kuni Istanbul bosh prokuraturasi 37 nafar gumonlanuvchini, jumladan, Isroil bosh vaziri Netanyahu, Isroil mudofaa vaziri Israel Kats, milliy xavfsizlik vaziri Itamar Ben-Gvir, shuningdek, armiya bosh shtabi boshlig‘i Eyal Zamirni hibsga olishga order berdi. Ular G‘azo sektorida «genotsid va insoniyatga qarshi jinoyatlar» va avvalroq Falastin hududidagi dengiz qamalini buzishga uringan Sumud flotiliyasi kemalariga nisbatan qonunbuzarliklarda ayblanmoqda.

Shu bilan birga Netanyahuga nisbatan Xalqaro jinoiy sud (XJS) tomonidan berilgan hibsga olish orderi hamon amal qilmoqda. Isroil bosh vaziri «kamida 2023 yil 8 oktyabrdan 2024 yil 20 maygacha sodir etilgan insoniyatga qarshi jinoyatlar va harbiy jinoyatlarda» gumon qilinmoqda. Tel-Aviv bu chorani antisemitizm deb atagan.