Rossiyalik kriptotreyder Roman Novak va uning rafiqasi BAAda o‘ldirildi

Peterburglik kriptoinvestor Roman Novak va uning rafiqasi Anna Birlashgan Arab Amirliklarida o‘ldirilgan. Bu haqda 7 noyabr kuni Peterburg nashrlari — “Fontanka” va 78.ru manbalarga tayanib xabar berdi.

Nashr suhbatdoshlarining ma’lumotiga ko‘ra, er-xotin taxminan bir oy avval qarindoshlari bilan aloqaga chiqishni to‘xtatgan. “Fontanka” yozishicha, Roman va Anna Xatta shahri chetidagi ijara villada, go‘yoki potensial investorlar bilan uchrashuv bahonasida chaqirilib, o‘ldirilgan. Jinoyatning ehtimoliy sababi — pul undirish.

Jinoyatchilar Novakning kriptohamyonini qo‘lga kiritishni istagan, u yerda “milliardlab dollar” bor, deb hisoblagan. Biroq hamyon bo‘sh chiqqan. Shundan keyin Roman va Anna o‘ldirilgan, jasadlari parchalangan va bo‘laklari paketlarga solingan. Paketlar Xattadagi savdo markazi atrofidagi turli konteynerlarda qoldirilgan, deya xabar berildi.

Sankt-Peterburg bo‘yicha Rossiya Tergov qo‘mitasi Bosh tergov boshqarmasi BAAda “bedarak yo‘qolgan” er-xotindan so‘ng ikki kishi qotilligi bo‘yicha jinoyat ishini qo‘zg‘atganini ma’lum qildi. Idora yo‘qolganlar ismlarini keltirmadi. Ish qarindoshlarning arizasi asosida qo‘zg‘atilgan.

Tergov versiyasiga ko‘ra, er-xotin 2 oktyabr kuni Xattada “noma’lum investorlar” bilan uchrashuvga jo‘nagan. Shaxsiy haydovchi ularni ko‘l yonidagi avtoturargohga olib borgan, shundan keyin Novaklar boshqa mashinaga o‘tirib ketgan. Keyin ular bilan aloqa uzilgan.

“Fontanka”ning yozishicha, ish doirasida sakkiz kishi qo‘lga olingan, kamida uch nafari Sankt-Peterburgdan. Qotillikning bevosita tashkilotchilari va ijrochilari sifatida 44—53 yoshlardagi uch erkak ko‘rilayotgani aytilmoqda. Yana to‘rt nafari mashina va villa ijaraga olgan, pichoqlar xarid qilgan va Roman hamda uning rafiqasi bilan aloqa o‘rnatgan. Sakkizinchi gumonlanuvchining roli ochiqlanmagan.

47.ru ma’lumotiga ko‘ra, qotillikni 53 yoshli Konstantin, 46 yoshli Yuriy va 45 yoshli Vladimir tashkil etgan. Familiyalari oshkor etilmagan. Ikki shaxs Leningradda tug‘ilgan, uchinchisi Qozog‘istonning Temirtau shahridan. Ular qotillikdan keyin qaytib kelgan Sankt-Peterburgda qo‘lga olingan.

Sankt-Peterburgning Oktyabr tuman sudi 7 noyabr kuni ish bo‘yicha ayblanayotgan uch shaxs — Konstantin Shaxta, Yuriy Sharipov va Vladimir Dalyokinni hibsga oldi, deb xabar berdi shahar sudlari matbuot xizmati. Ular 28 dekabrgacha qamoqda qoldirildi. Shaxta va Dalyokin aybini tan olmadi, Sharipov aybini qisman tan oldi. Jarayon yopiq tartibda o‘tdi.

Roman Novak tezkor kriptoto‘lovlar uchun Fintopio ilovasi yaratuvchisi sifatida tanilgan. Loyihaga u taxminan 500 mln dollar investitsiya jalb qilgan, so‘ng pullar bilan bedarak yo‘qolgan, deb yozadi 78.ru. Fintopio xodimlari maoshsiz qolgan, investorlar — jumladan, Xitoy va Yaqin Sharq tadbirkorlari — pullarini yo‘qotgan.

Investorlarni ishontirish uchun Roman Novak o‘zini arab shahzodalari va Telegram asoschisi Pavel Durov bilan tanish deb ta’kidlagan. Durov bu tanishlikni tasdiqlamagan.

2020 yil noyabrida Roman Novak firibgarlik uchun olti yil ozodlikdan mahrum etish jazosiga hukm qilingan. Sudning qayd etishicha, u “Sport v narod” loyihasi hammuassisidan 100 ming dollar o‘g‘irlash rejasini ishlab chiqqan, deb yozadi RBK.