Россиялик криптотрейдер Роман Новак ва унинг рафиқаси БААда ўлдирилди

Петербурглик криптоинвестор Роман Новак ва унинг рафиқаси Анна Бирлашган Араб Амирликларида ўлдирилган. Бу ҳақда 7 ноябр куни Петербург нашрлари — “Фонтанка” ва 78.ru манбаларга таяниб хабар берди.

Нашр суҳбатдошларининг маълумотига кўра, эр-хотин тахминан бир ой аввал қариндошлари билан алоқага чиқишни тўхтатган. “Фонтанка” ёзишича, Роман ва Анна Хатта шаҳри четидаги ижара виллада, гўёки потенциал инвесторлар билан учрашув баҳонасида чақирилиб, ўлдирилган. Жиноятнинг эҳтимолий сабаби — пул ундириш.

Жиноятчилар Новакнинг криптоҳамёнини қўлга киритишни истаган, у ерда “миллиардлаб доллар” бор, деб ҳисоблаган. Бироқ ҳамён бўш чиққан. Шундан кейин Роман ва Анна ўлдирилган, жасадлари парчаланган ва бўлаклари пакетларга солинган. Пакетлар Хаттадаги савдо маркази атрофидаги турли контейнерларда қолдирилган, дея хабар берилди.

Санкт-Петербург бўйича Россия Тергов қўмитаси Бош тергов бошқармаси БААда “бедарак йўқолган” эр-хотиндан сўнг икки киши қотиллиги бўйича жиноят ишини қўзғатганини маълум қилди. Идора йўқолганлар исмларини келтирмади. Иш қариндошларнинг аризаси асосида қўзғатилган.

Тергов версиясига кўра, эр-хотин 2 октябр куни Хаттада “номаълум инвесторлар” билан учрашувга жўнаган. Шахсий ҳайдовчи уларни кўл ёнидаги автотураргоҳга олиб борган, шундан кейин Новаклар бошқа машинага ўтириб кетган. Кейин улар билан алоқа узилган.

“Фонтанка”нинг ёзишича, иш доирасида саккиз киши қўлга олинган, камида уч нафари Санкт-Петербургдан. Қотилликнинг бевосита ташкилотчилари ва ижрочилари сифатида 44—53 ёшлардаги уч эркак кўрилаётгани айтилмоқда. Яна тўрт нафари машина ва вилла ижарага олган, пичоқлар харид қилган ва Роман ҳамда унинг рафиқаси билан алоқа ўрнатган. Саккизинчи гумонланувчининг роли очиқланмаган.

47.ru маълумотига кўра, қотилликни 53 ёшли Константин, 46 ёшли Юрий ва 45 ёшли Владимир ташкил этган. Фамилиялари ошкор этилмаган. Икки шахс Ленинградда туғилган, учинчиси Қозоғистоннинг Темиртау шаҳридан. Улар қотилликдан кейин қайтиб келган Санкт-Петербургда қўлга олинган.

Санкт-Петербургнинг Октябр туман суди 7 ноябр куни иш бўйича айбланаётган уч шахс — Константин Шахта, Юрий Шарипов ва Владимир Далёкинни ҳибсга олди, деб хабар берди шаҳар судлари матбуот хизмати. Улар 28 декабргача қамоқда қолдирилди. Шахта ва Далёкин айбини тан олмади, Шарипов айбини қисман тан олди. Жараён ёпиқ тартибда ўтди.

Роман Новак тезкор криптотўловлар учун Fintopio иловаси яратувчиси сифатида танилган. Лойиҳага у тахминан 500 млн доллар инвестиция жалб қилган, сўнг пуллар билан бедарак йўқолган, деб ёзади 78.ru. Fintopio ходимлари маошсиз қолган, инвесторлар — жумладан, Хитой ва Яқин Шарқ тадбиркорлари — пулларини йўқотган.

Инвесторларни ишонтириш учун Роман Новак ўзини араб шаҳзодалари ва Telegram асосчиси Павел Дуров билан таниш деб таъкидлаган. Дуров бу танишликни тасдиқламаган.

2020 йил ноябрида Роман Новак фирибгарлик учун олти йил озодликдан маҳрум этиш жазосига ҳукм қилинган. Суднинг қайд этишича, у “Спорт в народ” лойиҳаси ҳаммуассисидан 100 минг доллар ўғирлаш режасини ишлаб чиққан, деб ёзади РБК.