Prezident: «Zamonaviy tibbiyotni farmatsevtikasiz tasavvur qilib bo‘lmaydi»

Davlat rahbari yig‘ilganlarga el-yurt salomatligi yo‘lida fidoiy mehnat qilayotgan barcha soha vakillariga chuqur minnatdorlik izhor etdi. Prezidentning ta’kidlashicha, zamonaviy sog‘liqni saqlash tizimining barqaror rivoji tibbiy ta’lim va ilmiy-tadqiqot bilan birga farmatsevtika tarmog‘ining jadal modernizatsiyasiga bevosita bog‘liq.

«Bugun soha taraqqiyotiga xizmat qiladigan ko‘plab yangi tashabbuslarni sizlar bilan muhokama qilamiz. Zamonaviy tibbiyotni farmatsevtikasiz tasavvur qilib bo‘lmaydi. Bundan buyon ushbu bayramni “Tibbiyot va farmatsevtika xodimlari kuni” deb nishonlasak, o‘ylaymanki, sizlar buni qo‘llab-quvvatlaysizlar. Buning barchasi tibbiyot va farmatsevtika xodimlariga ko‘proq izlanish, ilg‘or davolash va profilaktika usullarini egallashda katta rag‘bat, kuch-g‘ayrat beradi», — dedi prezident.

Uchrashuvda tizimda amalga oshirilayotgan islohotlar natijadorligi, kelgusi yil uchun ustuvor vazifalar, kadrlar tayyorlash, klinik amaliyot va ilmiy faoliyat integratsiyasi, shuningdek farmatsevtika klasterini rivojlantirish bo‘yicha takliflar muhokama etildi.