O‘zbekistonda noqonuniy kosmetika preparatlaridan foydalanganlarda og‘ir nojo‘ya reaksiyalar kuzatildi

O‘zbekistonda noqonuniy kosmetika preparatlaridan foydalanganlarda botulizm aniqlandi. Farmatsevtika mahsulotlari xavfsizligi markazi ogohlantirish bilan chiqdi.

Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi klinikasiga murojaat qilgan ayrim bemorlarda botulinotoksin saqlovchi “Refinex Botulinum Toxin Type A for Therapy” va “Dysport 500 Clostridium botulinum type A toxin-haemagglutinin complex” mahsulotlari kosmetologik maqsadlarda qo‘llanilganidan so‘ng og‘ir nojo‘ya reaksiyalar, jumladan botulizmga xos klinik belgilar kuzatilgan.

Ma’lum qilinishicha, hozirda mazkur mahsulotlarning kelib chiqishi va ularning qonuniy muomalasi bilan bog‘liq holatlar yuzasidan tegishli tekshiruv ishlari olib borilmoqda.

“Shuni alohida qayd etish kerakki, “Refinex Botulinum Toxin Type A for Therapy” va “Dysport 500 Clostridium botulinum type A toxin-haemagglutinin complex” mahsulotlari O‘zbekistonda davlat ro‘yxatidan o‘tkazilmagan. Shu sababli ularning xavfsizligi, sifati va samaradorligi belgilangan tartibda baholanmagan”, deyiladi xabarda.

Markaz internet yoki ijtimoiy tarmoqlar orqali taklif etilayotgan shubhali mahsulotlarni sotib olmaslik, agar ushbu mahsulotlar xarid qilingan bo‘lsa, ularni qo‘llamaslik, qo‘llash boshlangan bo‘lsa foydalanishni darhol to‘xtatish va shifokorga murojaat qilishni tavsiya etgan.

Ushbu mahsulotlarni qo‘llagan shaxslarda ko‘rishning xiralashishi, qovoqlarning tushib qolishi, yutinish qiyinlashishi, nutq buzilishi, mushaklar kuchsizligi, nafas olish qiyinlashishi yoki boshqa noodatiy alomatlar kuzatilsa, zudlik bilan tibbiy yordamga murojaat qilish so‘ralgan. 

Markaz holat bo‘yicha nazorat va o‘rganish ishlari davom ettirilayotganini qo‘shimcha qilgan.