RFda diversiyalar uchun jinoiy javobgarlik 14 yoshdan joriy etiladi

Rossiya Davlat Dumasi 11 noyabr kuni diversiya xususiyatidagi jinoyatlar bo‘yicha jinoiy javobgarlik yoshini 16 yoshdan 14 yoshga tushirish to‘g‘risidagi qonun loyihasini ikkinchi va uchinchi o‘qishda qabul qildi.

Bundan tashqari, qabul qilingan qonun loyihasi voyaga yetmaganlarni terrorchilik va diversiya faoliyatiga jalb qilish uchun jazoni kuchaytiradi, diversiya xususiyatidagi barcha jinoyatlar bo‘yicha eskirish muddatlarini bekor qiladi va diversiya hamjamiyati a’zolarini shartli jazoga hukm qilishni taqiqlaydi. Diversiyalarga aloqador jinoyatlarda aybdor deb topilganlarga jazoning kamida 3/4 qismini o‘tamasdan turib, muddatidan ilgari shartli ravishda ozod qilishga da’vogarlik qilish taqiqlanadi.

Qonun loyihasining tashabbuskorlari sifatida 2025 yil 20 oktyabr kuni Davlat Dumaga kiritilgan hujjatga barcha fraksiyalarning 419 deputati ko‘rsatilgan. Quyi palata raisi o‘rinbosari Irina Yarovaya buni bir qonun loyihasi uchun imzolar soni bo‘yicha rekord deb atadi.

«Sever.Realii» loyihasi 2025 yil avgust oyida hisob-kitob qilganidek, Ukrainadagi urush boshlanganidan beri Rossiyada diversiya uchun mahkum qilinganlar orasida har to‘rt shaxsdan biri o‘spirin bo‘lgan, ammo o‘sha paytda jinoiy javobgarlik 16 yoshdan boshlangan (yangi qonun loyihasida — 14 yoshdan).

Shuningdek, 2025 yilning dastlabki olti oyi ichida RFda kamida 42 nafar o‘spirin terrorizm va diversiyaga oid moddalar bo‘yicha ayblanib qo‘lga olingani qayd etildi, deb yozadi jurnalistlar. Ma’lumotda aytilishicha, bu raqam kattaroq bo‘lishi mumkin, chunki ayrim OAV va kuch tuzilmalari nashrlarida «o‘spirinlar guruhi» qo‘lga olingani haqida aniq soni ko‘rsatilmasdan xabar berilgan.