Xitoy gibrid yo‘ltanlamasi Ginness rekordini o‘rnatdi

Xitoyning Hongqi HS6 gibrid krossoveri bir marta to‘liq quvvatlanish va to‘la benzin baki bilan 2325 kilometr masofani bosib o‘tdi va Ginnesning yangi rekordini o‘rnatdi. HS6 tashqi tokdan zaryadlanadigan gibridlar ichida eng ko‘p masofa bosib o‘ta olgan modelga aylandi.

Hongqi HS6 Foto: BitAuto

2325 kilometrlik yo‘l Shangri-Lada 30 oktyabr kuni start oldi va 3 noyabr kuni Guanchjouda yakunlandi. Sayohat davomida avtomobil Kunmin, Bayse va Uchjou shaharlari orqali o‘tib, o‘zining bardoshliligi va yonilg‘i tejamkorligini yaqqol namoyon etdi.

Bu rekord Hongqi muhandislik tafakkurining shiddat bilan ilgarilayotganini va brendning jahon bozori uchun uzoq masofaga mo‘ljallangan barqaror gibrid texnologiyalarni rivojlantirishga intilishini tasdiqlaydi. Avvalgi rekordchilar — masalan, Chery Fulwin T10 ko‘rsatkichlarini ortda qoldirgan Hongqi HS6 gibrid modellar uchun chidamlilik va samaradorlikning yangi me’yorlarini belgiladi.

HS6 PHEV uchun oldindan sotuvlar Xitoyda 15 noyabr kuni start oladi — bu brendning global ekspansiyasi doirasidagi navbatdagi qadamdir. Ichki bozordan tashqari, Hongqi Yevropaga va Yaqin Sharqqa chiqishni rejalashtirmoqda, premium segmentdagi gibrid yo‘ltanlamaclar qatorida mustahkam o‘rin egallashga intilmoqda. Model kompaniyaning sinab ko‘rilgan muhandislik qudratini nafis dizayn va qulaylik bilan uyg‘unlashtirish yondashuvini aks ettiradi hamda xitoylik ishlab chiqaruvchilarning texnologiya va ijro sifati jihatidan raqobatga tayyorligi ortib borayotganini ko‘rsatadi.

Dunyo rekordi modelning ishonchli muhandislik yechimlarini isbotlasa, uning dizayni Xitoy avtoishlab chiqaruvchilari premium segmentda tobora raqobatbardosh bo‘layotganini tasdiqlaydi.

Tayyorlagan: Отабек Матназаров

#Xitoy #Hongqi