Erdo‘g‘an Turkiya o‘zga hududlarga «hasad qilmasligini» aytdi

Turkiya o‘zga hududga «hasad qilmaydi» va har bir davlatning mustaqilligini hurmat qiladi. Ammo Turkiya xalqi «ma’naviy vatanni» asrab-avaylash muhimligini unutmasligi kerak, dedi prezident Rajab Toyyib Erdo‘g‘an «Adolat va taraqqiyot partiyasi» parlament guruhi yig‘ilishida.

Erdo‘g‘an o‘z nutqida Turkiya boshqa davlatlarning hududlariga «hasad qilmaganini va hasad qilmasligini» va har bir davlatning mustaqilligini hurmat qilishini ta’kidladi.

«Biroq, ajdodlarimiz misolida ko‘rganimizdek, ma’naviy vatandan, insoniylikdan, insoniy qadriyatlardan yuz o‘girishdek dabdabalarga yo‘l qo‘yib bo‘lmaydi <...> Bu jonajon mamlakat uchun chegaralar o‘tkazish mumkin, ammo qalbimiz geografiyasi uchun chegaralar o‘tkazib bo‘lmaydi, qalbimiz geografiyasini bu jonajon mamlakat xotirasidan o‘chirib bo‘lmaydi», dedi siyosatchi.

Turkiya qo‘shni davlatlar bilan bir nechta hududiy va dengiz nizolariga ega. Ularning asosiylari quruqlik chegaralari bilan emas, balki dengiz zonalari, shelf va resurslarni qazib olish huquqi bilan bog‘liq.

Shu bilan birga, Turkiya «Moviy Vatan» doktrinasiga ko‘ra, Egey, O‘rtayer va Qora dengizdagi katta dengiz hududlariga bo‘lgan da’volarini kengaytirmoqda. Mintaqadagi dengiz chegaralarini qayta ko‘rib chiqishni talab qilmoqda.

Bundan tashqari, Turkiya Suriya bilan Xatay masalasida bahsga ega. Xatay viloyati 1939 yilda Turkiyaga qo‘shib olingan. Suriya anneksiyani rasman tan olmaydi, ammo amalda mojaro deyarli muzlatilgan.