Farg‘onada 1,5 mlrd so‘mlik hujjatsiz dori savdosi fosh etildi

Farg‘ona viloyatining O‘zbekiston tumanida yashovchi, 1990 yilda tug‘ilgan fuqaro tadbirkor sifatida davlat ro‘yxatidan o‘tmasdan, o‘ziga tegishli noturar binoda hujjatlarsiz chakana dori savdosi bilan shug‘ullanayotgan paytida fosh etildi. Undan umumiy qiymati 1 mlrd 565 mln so‘mlik, asosan hujjatsiz dori vositalari topildi.

Foto: DXX

Ma’lum qilinishicha, fuqaro tadbirkor sifatida rasman davlat ro‘yxatidan o‘tmasdan, Farg‘ona viloyatining O‘zbekiston tumanida joylashgan o‘ziga qarashli noto‘g‘ri maqsadda foydalanilayotgan noturar binoda tegishli ruxsat va hujjatlarsiz tibbiy dori vositalarini chakana sotib kelgan.

Davlat xavfsizlik xizmati, Iqtisodiy jinoyatlarga qarshi kurashish departamenti hamda Bojxona qo‘mitasi xodimlari hamkorligida o‘tkazilgan tezkor tadbir davomida ushbu manzil ko‘zdan kechirildi.

Tekshiruv natijasida binoda jami 66 turdagi 41 319 dona dori vositalari borligi aniqlandi, shulardan 56 turdagi 36 361 dona dori vositasining muvofiqlik sertifikatlari mavjud emasligi ma’lum bo‘ldi, dori vositalarining umumiy qiymati 1 mlrd 565 mln so‘m etib baholandi.

Dorilar tegishli sharoitlar talablariga to‘la javob bermaydigan holda saqlangani ham qayd etilgan.

Hozirda mazkur holat yuzasidan fuqaroga nisbatan Jinoyat kodeksining 186³-moddasi 3-qismi “a” bandi (sifat talablariga javob bermaydigan yoki belgilangan tartibda ro‘yxatdan o‘tkazilmagan dori vositalari bilan noqonuniy muomala) bilan jinoyat ishi qo‘zg‘atilgan. Tergov harakatlari olib borilmoqda.