Avtomobil yuvish xizmatlari narxi bir yilda qariyb 10 foizga o‘sdi

Milliy statistika qo‘mitasi ma’lumotlariga ko‘ra, 2025 yil noyabr oyida shaxsiy transport vositalarini yuvish xizmatlari narxlari 2025 yil oktyabr oyiga nisbatan o‘rtacha 0,6 foizga qimmatlashgan.

Rasmiy statistikada ta’kidlanishicha, ushbu turdagi xizmatlar narxi 2025 yil boshidan shu kunga qadar jami 7,4 foizga oshgan. 2024 yil noyabr oyiga nisbatan esa avtomobil yuvish xizmatlari narxlarida 9,4 foizlik yillik o‘sish kuzatilgan.

Mutaxassislar ta’kidlashicha, xizmat ko‘rsatish sohasidagi qimmatlashuv bir qator omillar, jumladan, ishchi kuchi, suv va energiya resurslari, maxsus kimyoviy vositalar hamda ijara xarajatlarining ortishi bilan bog‘liq bo‘lishi mumkin. Shu bilan birga, shaxsiy avtomobillar soni ko‘payishi fonida bu xizmatlarga bo‘lgan talab barqaror saqlanib qolayotgani ham narxlarga ta’sir etuvchi omillardan biri sifatida tilga olinmoqda.

Milliy statistika qo‘mitasi xizmatlar bozoridagi o‘zgarishlar, jumladan, turli turdagi maishiy va transport xizmati narxlaridagi dinamika bo‘yicha kuzatuvlarni davom ettirmoqda.