Toshkentda O‘zbekiston–Koreya strategik sherikligi muhokama qilindi

Toshkentda bo‘lib o‘tgan muloqot avvalida oliy martabali mehmon davlat rahbariga Koreya prezidenti Li Chje Myonning samimiy salomi va ezgu tilaklarini yetkazdi. 

Uchrashuvda O‘zbekiston va Koreya o‘rtasidagi siyosiy hamda parlamentlararo aloqalar jadal tus olgani qayd etildi. Shuningdek, tovar ayirboshlash hajmi va Koreyadan, avvalo, iqtisodiyotni modernizatsiya qilish hamda yuqori texnologiyali sanoat tarmoqlarini rivojlantirishga qaratilgan investitsiyalar ko‘payib borayotgani ta’kidlandi. 

Tomonlar gumanitar va ta’lim almashinuvlari kengayayotganiga ham e’tibor qaratdi. Xususan, O‘zbekistonda Koreya yetakchi universitetlarining to‘rtta filiali va hududlardagi professional ta’lim markazlari faoliyat yuritayotgani qayd etildi. 

Shuningdek, infratuzilmani rivojlantirish, transport-logistika, nodir metallar va o‘ta muhim xomashyoni qayta ishlash, qonun ijodkorligini raqamlashtirish hamda boshqaruvda ilg‘or yechimlarni joriy etish yo‘nalishlarida kooperatsiya loyihalarini amalga oshirish qo‘llab-quvvatlandi. Parlamentlararo hamkorlik dasturini ishlab chiqish va parlamentlardagi “do‘stlik guruhlari” faoliyatini kuchaytirish muhimligi ta’kidlandi. 

Uchrashuv yakunida bo‘lajak oliy darajadagi tadbirlar, jumladan “Markaziy Osiyo – Koreya Respublikasi” sammiti doirasidagi uchrashuvlar kun tartibini puxta tayyorlash zarurligi qayd etildi.