Akkreditatsiya to‘lovlari qaytarilmaydi: ta’lim tashkilotlari uchun yangi qoidalar

Hujjatga muvofiq, mazkur nizom o‘rta maxsus, kasbiy, oliy va oliy ta’limdan keyingi ta’lim, shuningdek, kadrlarni qayta tayyorlash va malaka oshirish tashkilotlarini kompleks hamda maxsus davlat akkreditatsiyasidan o‘tkazishda yig‘imlarni hisoblash va undirish tartibini belgilaydi.

Nizom loyihasida arizani ko‘rib chiqish uchun yig‘im bazaviy hisoblash miqdorining ikki baravari etib belgilangan. Kompleks va maxsus akkreditatsiya bo‘yicha bazaviy yig‘imlar ta’lim turiga qarab belgilanadi. Jumladan, oliy ta’lim tashkilotlarini kompleks davlat akkreditatsiyasidan o‘tkazish uchun bazaviy yig‘im 420 BHM, maxsus davlat akkreditatsiyasi uchun (har bir ta’lim dasturi bo‘yicha) 100 BHM etib ko‘rsatilgan.

Shuningdek, ta’lim tashkilotining asosiy binosi joylashgan hududdan tashqaridagi har bir o‘quv binosi (kampus) uchun qo‘shimcha ravishda 12 BHM miqdorida yig‘im undirilishi nazarda tutilgan.

Qayd etilishicha, davlat akkreditatsiyasidan o‘tkazish uchun amalga oshirilgan barcha yig‘imlar, akkreditatsiya natijasidan qat’i nazar, ta’lim tashkilotiga qaytarilmaydi. Ayrim hollarda esa ta’lim tashkilotining to‘lovga qobiliyatsizligi asoslantirilsa, agentlik bilan kelishilgan grafik asosida yig‘imlarni bo‘lib to‘lash imkoniyati mavjud.