Oltin izlovchilar reyestri va nazorat tartibi bo‘yicha me’yorlar o‘zgarmoqda

“Yer qa’ri to‘g‘risida”gi qonunga muvofiq hamda uning ijrosini samarali tashkil etish, huquqiy qoidalarni qo‘llashda turlicha talqinlar va qarama-qarshiliklarni bartaraf etish maqsadida prezidentning ayrim hujjatlariga o‘zgartirish va qo‘shimchalar kiritish nazarda tutilgan.

Xususan, 2018 yil 26 noyabrdagi PQ-4030-son qarorga kiritilayotgan o‘zgartirishlarga ko‘ra, hujjatning 2-bandidagi “35 baravari” ifodasi “100 baravari” so‘zlari bilan almashtirilishi belgilanmoqda. Shuningdek, qimmatbaho metallarni oltin izlovchilar usulida qazib olish faoliyati bilan shug‘ullanuvchi shaxslarning reyestrini yuritish Tog‘-kon sanoati va geologiya vazirligi huzuridagi “Yer qa’ridan foydalanish markazi” davlat muassasasi tomonidan amalga oshirilishi ko‘zda tutilgan.

Qayd etilishicha, ularga ajratilgan yer qa’ri uchastkalari ustidan davlat nazorati esa Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi tomonidan amalga oshiriladi.

Mazkur hujjat o‘zgarishlari “Yer qa’ri to‘g‘risida”gi qonun ijrosini ta’minlash hamda sohadagi huquqiy ziddiyatlarni bartaraf etishga qaratilgani bildirilgan.