Zelenskiy Tashqi razvedka xizmati rahbarini Budanov o‘rniga tayinladi

Ukraina Tashqi razvedka xizmatining sobiq rahbari, general-leytenant Oleg Ivashchenko mamlakat Mudofaa vazirligining Bosh razvedka boshqarmasi (GUR) rahbari etib tayinlandi. Bu haqda Ukraina prezidenti Volodimir Zelenskiy juma kuni, 2 yanvarda o‘zining Telegram-kanalida ma’lum qildi.

“Bugundan boshlab Oleg Ivashchenko davlatimizga xizmat qilishni davom ettiradi va Ukraina harbiy razvedkasi pozitsiyasida Rossiyaning harbiy salohiyatini cheklash bo‘yicha vazifalarni bajaradi”, — deb yozdi Zelenskiy.

Oleg Ivashchenko 1969 yilda tug‘ilgan. 2017–2019 yillarda GUR boshlig‘ining birinchi o‘rinbosari hamda Ukraina Qurolli kuchlari Bosh shtabi boshlig‘ining razvedka bo‘yicha o‘rinbosari lavozimlarini egallagan. 2021 yildan Ukraina Qurolli kuchlari bosh qo‘mondonining yordamchisi vazifasini bajargan, 2024 yil 26 martda esa Volodimir Zelenskiy farmoni bilan Ukraina tashqi razvedkasi rahbari etib tayinlangan.

2024 yil 29 martda Ukraina Qurolli kuchlari oliy bosh qo‘mondoni stavkasi a’zosi, shuningdek Ukraina Milliy xavfsizlik va mudofaa kengashi a’zosi bo‘lgan.

2025 yil 29 noyabrda Ivashchenko Zelenskiy farmoniga ko‘ra, Rustem Umerov rahbarligida Rossiyaning Ukrainaga qarshi urushiga barham berish bo‘yicha muzokaralar guruhi tarkibiga ham kiritilgan.

Avvalroq Ukraina Mudofaa vazirligi GURning sobiq rahbari Kirill Budanov davlat rahbarining Ukraina prezidenti ofisiga rahbarlik qilish taklifini qabul qilgan. “Men uchun bu — tarixiy davrda Ukraina uchun o‘ta muhim bo‘lgan strategik xavfsizlik masalalariga e’tibor qaratish mas’uliyati”, — deb yozgan Budanov.

Zelenskiyning so‘zlariga ko‘ra, prezident ofisi uchun ustuvor yo‘nalishlar Ukraina mudofaa va xavfsizlik kuchlarini rivojlantirish, shuningdek muzokaralardagi diplomatik yo‘nalish bo‘ladi. “Kirillda bu yo‘nalishlarda maxsus tajriba bor va natijaga erishish uchun yetarli kuch ham mavjud”, — deb yozdi Zelenskiy.

Avvalroq, “Energoatom” davlat korxonasidagi korrupsiya mojarosi fonida, prezident ofisi rahbari lavozimidan Andrey Yermak ketgan edi. U ish bo‘yicha unda tintuvlar o‘tkazilganidan keyin iste’fo haqida ariza yozgan.