Elektron hisobvaraq-fakturalar “past” va “yuqori” xavf toifalariga ajratiladi

Vazirlar Mahkamasi qarori bilan elektron hisobvaraq-fakturalarning (EHF) xavf darajasini aniqlash hamda ularda aks ettirilgan operatsiyalar bo‘yicha qo‘shilgan qiymat solig‘ini (QQS) to‘lash tartibini belgilaydigan nizom tasdiqlandi.

Foto: Unsplash

Hujjatda EHFlar tovar (xizmat)lar bitta yetkazib berish zanjiri bo‘yicha xavf darajasini baholash, ularni toifalarga ajratish hamda xavf darajasiga qarab EHF bo‘yicha QQSni to‘lash va hisobga olish xususiyatlari nazarda tutilgani qayd etilgan.

Nizomga ko‘ra, axborot tizimi orqali yuqori xavf deb topilgan EHF ulushi hisobot davrida QQS to‘lovchilari tomonidan rasmiylashtirilgan jami EHF sonining 10 foizidan oshmasligi kerak.

Ma’lum qilinishicha, EHFning xavf darajasi mezonlarini O‘zbekiston Soliq qo‘mitasi belgilaydi. EHF esa axborot tizimida belgilangan har bir mezon bo‘yicha ballar yig‘indisi asosida avtomatik tarzda baholanib, umumiy ballga ko‘ra “past xavf” va “yuqori xavf” toifalariga ajratiladi.

Shuningdek, Soliq qo‘mitasi xavf darajasini hisobga olgan holda EHFning markazlashtirilgan elektron reyestrini yuritishi belgilangan.