Tramp Yevropaning qator mamlakatlariga nisbatan bojlar kiritilishini e’lon qildi

AQSh prezidenti Donald Tramp Daniya, Norvegiya, Shvetsiya, Fransiya, Germaniya, Buyuk Britaniya, Niderlandiya va Finlandiyaga nisbatan bojlar joriy etilishini e’lon qildi.

"2026 yil 1 fevraldan boshlab yuqorida nomlari tilga  olingan mamlakatlarning AQShga yetkazib beradigan barcha mahsulotlari uchun o‘n foizlik boj joriy etiladi", — deb yozdi u Truth Social ijtimoiy tarmog‘ida.

Uning qayd etishicha, 1 iyundan tarif 25 foizga oshiriladi, bojlar esa "Grenlandiya to‘liq va yakuniy jihatdan qo‘lga kiritilmaguncha" amal qiladi. 

Trampning so‘zlariga ko‘ra, AQSh uzoq yillar davomida Daniya va YeIning barcha mamlakatlariga subsidiya berib kelgan. Endi esa ular Grenlandiyaning olinishiga to‘sqinlik qilib, "xavfli o‘yin qilishmoqda".

Avvalroq Oq uy ma’muriyati rahbarining o‘rinbosari, AQSh prezidentining ichki xavfsizlik bo‘yicha maslahatchisi Stiven Miller Grenlandiyani faqat uni himoya qiladiganlargina nazorat qilishi mumkinligi, Daniya esa bunga juda kichiklik va ojizlik qilishini aytgandi.

Shu haftada Daniya va Grenlandiya tashqi ishlar vazirlari Oq uyda AQSh davlat kotibi Marko Rubio va vitse-prezident Jyey Di Vens bilan uchrashuv o‘tkazdi, lekin Amerikaning Grenlandiya bo‘yicha nuqtai nazarini o‘zgartirishga erisha olmadi.

Yevropa mamlakatlari orolga o‘z harbiylarini jo‘natishga tayyorligini bildirgan, ammo Oq uy matbuot kotibi Karolin Levittning so‘zlariga ko‘ra, bu AQSh prezidentining rejalariga hech qanday ta’sir ko‘rsatmaydi.