Grenlandiya va Daniya aholisi Trampga qarshi namoyishga chiqdi

Grenlandiya va Daniyada minglab odamlar AQSh prezidenti Donald Trampning Grenlandiyani bosib olish rejalariga qarshi norozilik namoyishiga chiqdi.

Grenlandiya va Daniya nodavlat tashkilotlari tomonidan tashkil etilgan norozilik namoyishlari Daniyaning bir qator shaharlarida, jumladan, Kopenhagenda, shuningdek, Grenlandiya poytaxti Nuukda bo‘lib o‘tdi.

«Biz Daniya qirolligi va Grenlandiyaning o‘z taqdirini o‘zi belgilash huquqini hurmat qilishni talab qilamiz», – dedi Grenlandiya assotsiatsiyalarini birlashtirgan Inuit tashkiloti rahbari Kamilla Sizing.

Tramp Amerikaning milliy xavfsizligi uchun hal qiluvchi ahamiyatga ega bo‘lgan Grenlandiyani egallab olishni istisno qilmayapti, shanba kuni esa uning rejasiga qarshi chiqayotgan Yevropa davlatlari tovarlariga bojlar joriy etilishi mumkinligi haqida xabarlar paydo bo‘ldi.

AQSh prezidenti Daniya, Norvegiya, Shvetsiya, Fransiya, Germaniya, Buyuk Britaniya, Niderlandiya va Finlandiya tovarlariga 1 fevraldan boshlab 10 foizlik boj qo‘llanishini ma’lum qilgan.

U 1 iyundan bojlar 25 foizgacha oshirilishi va Qo‘shma Shtatlar «Grenlandiyani to‘liq qo‘lga kiritish» bo‘yicha kelishuvga erishmaguncha bu bojlar amal qilishda davom etishi bilan tahdid qildi.

Kopenhagendagi norozilik namoyishlarida odamlar «Grenlandiyadan qo‘lingni tort», «Yankilar, uyingga yo‘qol!» va «Grenlandiya sotilmaydi» kabi yozuvlar aks etgan plakatlarni ko‘tarib chiqishdi.

«Daniyalik bo‘lishimizga va Daniyada yashashimizga qaramay, biz grenlandiyaliklar bilan birdammiz, biz katta birdamlikni his qilyapmiz va bu vaziyatdan chinakamiga g‘azablanyapmiz. Biz hammamiz Amerika prezidentining miyasiga bunday g‘oyalar kelishi mumkinligidan hayratdamiz», – deydi Kopenhagendagi norozilik namoyishiga kelgan daniyalik rejissyor Sharlotta Saks Bostrup.

«Biz birdam bo‘lib qolishimiz va Grenlandiya sotilmasligini, biz AQShning bir qismi bo‘lishni va AQSh tomonidan anneksiya qilinishni istamasligimizni ko‘rsatishimiz juda muhim», – dedi grenlandiyalik siyosatchi Erik Yyensen Reuters agentligiga.

Nuukda Grenlandiya bosh vaziri Yyens-Frederik Nilsen «Grenlandiya sotilmaydi» va «Biz o‘z kelajagimizni o‘zimiz belgilaymiz» plakatlari bilan AQSh konsulligiga ketayotgan namoyishchilarga qo‘shilgan.

«Biz xavotirdamiz va shunchaki o‘zimiz bilan qolishni va bu yerda o‘z hayotimizni yashashni xohlaymiz», – dedi Nuukdagi norozilik namoyishiga kelgan Alan Amstrup.

Jamoatchilik fikri so‘rovlari ko‘rsatishicha, Grenlandiya aholisining 85 foizi hududning AQShga qo‘shilishiga qarshi.