Гренландия ва Дания аҳолиси Трампга қарши намойишга чиқди

Гренландия ва Данияда минглаб одамлар АҚШ президенти Доналд Трампнинг Гренландияни босиб олиш режаларига қарши норозилик намойишига чиқди.

Гренландия ва Дания нодавлат ташкилотлари томонидан ташкил этилган норозилик намойишлари Даниянинг бир қатор шаҳарларида, жумладан, Копенҳагенда, шунингдек, Гренландия пойтахти Нуукда бўлиб ўтди.

«Биз Дания қироллиги ва Гренландиянинг ўз тақдирини ўзи белгилаш ҳуқуқини ҳурмат қилишни талаб қиламиз», – деди Гренландия ассоциацияларини бирлаштирган Inuit ташкилоти раҳбари Камилла Сизинг.

Трамп Американинг миллий хавфсизлиги учун ҳал қилувчи аҳамиятга эга бўлган Гренландияни эгаллаб олишни истисно қилмаяпти, шанба куни эса унинг режасига қарши чиқаётган Европа давлатлари товарларига божлар жорий этилиши мумкинлиги ҳақида хабарлар пайдо бўлди.

АҚШ президенти Дания, Норвегия, Швеция, Франция, Германия, Буюк Британия, Нидерландия ва Финландия товарларига 1 февралдан бошлаб 10 фоизлик бож қўлланишини маълум қилган.

У 1 июндан божлар 25 фоизгача оширилиши ва Қўшма Штатлар «Гренландияни тўлиқ қўлга киритиш» бўйича келишувга эришмагунча бу божлар амал қилишда давом этиши билан таҳдид қилди.

Копенҳагендаги норозилик намойишларида одамлар «Гренландиядан қўлингни торт», «Янкилар, уйингга йўқол!» ва «Гренландия сотилмайди» каби ёзувлар акс этган плакатларни кўтариб чиқишди.

«Даниялик бўлишимизга ва Данияда яшашимизга қарамай, биз гренландияликлар билан бирдаммиз, биз катта бирдамликни ҳис қиляпмиз ва бу вазиятдан чинакамига ғазабланяпмиз. Биз ҳаммамиз Америка президентининг миясига бундай ғоялар келиши мумкинлигидан ҳайратдамиз», – дейди Копенҳагендаги норозилик намойишига келган даниялик режиссёр Шарлотта Сакс Боструп.

«Биз бирдам бўлиб қолишимиз ва Гренландия сотилмаслигини, биз АҚШнинг бир қисми бўлишни ва АҚШ томонидан аннексия қилинишни истамаслигимизни кўрсатишимиз жуда муҳим», – деди гренландиялик сиёсатчи Эрик Йенсен Reuters агентлигига.

Нуукда Гренландия бош вазири Йенс-Фредерик Нилсен «Гренландия сотилмайди» ва «Биз ўз келажагимизни ўзимиз белгилаймиз» плакатлари билан АҚШ консуллигига кетаётган намойишчиларга қўшилган.

«Биз хавотирдамиз ва шунчаки ўзимиз билан қолишни ва бу ерда ўз ҳаётимизни яшашни хоҳлаймиз», – деди Нуукдаги норозилик намойишига келган Алан Амструп.

Жамоатчилик фикри сўровлари кўрсатишича, Гренландия аҳолисининг 85 фоизи ҳудуднинг АҚШга қўшилишига қарши.