Ukraina: Chernobil atom elektr stansiyasi energiya tizimiga ulangan

Chernobil atom elektr stansiyasi (ChAES) hududidagi barcha obektlar — jumladan yangi sarkofag va ishlatilgan yadro yonilg‘isini saqlash omborlari Ukraina birlashgan energetika tizimiga odatiy rejimda ulangan. Bu haqda Ukraina Energetika vazirligi seshanba, 20 yanvar kuni kunduzi Telegram’da xabar qildi.

“Sanoat maydonida va chiqarib tashlash hududidagi radiatsiya foni nazorat darajalaridan oshmaydi”, — deyiladi bayonotda. Vazirlik qo‘shimcha qilishicha, “qayta hujumlar sodir bo‘lgan taqdirda” stansiya zarur miqdorda yonilg‘i zaxirasi va soz holatdagi zaxira elektr manbalari bilan ta’minlangan.

Vazirlik ma’lumotiga ko‘ra, aholi va atrof-muhit uchun to‘g‘ridan to‘g‘ri xavf yo‘q. Energetiklar va stansiya xodimlari vaziyatni kuchaytirilgan rejimda kuzatishda davom etmoqda.

20 yanvar kuni ertalab Atom energiyasi xalqaro agentligi (AEXA) X ijtimoiy tarmog‘ida keng ko‘lamli jang harakatlari natijasida stansiya tashqi elektr ta’minotidan to‘liq mahrum bo‘lganini xabar qilgan.

“Ukraina Energetika vazirligi ta’kidlaydiki — agressorning bunday harakatlariga mutlaqo yo‘l qo‘yib bo‘lmaydi. Bu yadroviy va radiatsion xavfsizlikning barcha asosiy tamoyillarini qo‘pol tarzda buzishdir”, — deb qayd etgan vazirlik. “ChAES obektlarini elektrsiz qoldirish xavfini yuzaga keltirib, dushman nafaqat Ukrainaning, balki butun Yevropa qit’asining xavfsizligini tahdid ostiga qo‘yadi”, — deb ogohlantirish berilgan.

AEXA bosh direktori Rafael Grossi va Ukraina energetika vaziri Denis Shmixal agentlik boshqaruv kengashining navbatdan tashqari yig‘ilishini tashkil etishga kelishib olgan. Ukraina Energetika vazirligi ma’lum qilishicha, yig‘ilish “Rossiyaning Ukraina energetika tizimiga bergan hujumlari oqibatlarini baholash” uchun o‘tkaziladi.

AEXA avvalroq xabar berishicha, 20 yanvar ertalab ChAESdan boshqa stansiyalarga olib boruvchi elektr uzatish liniyalari (EUL) ham shikastlangan, shuningdek, yadroviy xavfsizlik uchun hayotiy ahamiyatga ega bo‘lgan Ukrainadagi bir qator elektr podstansiyalariga ham zarar yetgan.

Bundan oldin, 2025 yil 1 oktyabrda Rossiyaning energiya infratuzilmasini o‘qqa tutishi oqibatida ChAESda elektr ta’minoti vaqtincha uzilgan — u taxminan uch soat davom etgan. O‘shanda sarkofag va ishlatilgan yonilg‘i ombori elektrsiz qolgan. Elektr ta’minoti o‘sha kechning o‘zida qayta tiklashga muvaffaq bo‘lingan. Radiatsiya foni nazorat qiymatlaridan oshmagan.