Mahallalarda aholi muammolarini “xonadonbay” o‘rganish joriy etiladi

Yangi tartibga ko‘ra, “Mahalla yettiligi” vakillari har bir xonadondagi muammolarni belgilangan reja-grafik asosida o‘rganib boradi. Aniqlangan muammolar bosqichma-bosqich “Raqamli mahalla” elektron platformasiga kiritilishi yo‘lga qo‘yiladi.

Shuningdek, muammolarni tegishliligi bo‘yicha tezkor hal etish maqsadida platformada sun’iy intellekt orqali ularni tegishli vazirlik va idoralarga avtomatik taqsimlash imkoniyatini yaratish nazarda tutilgan. Muammo hal etilmagunga qadar uning ijro holati Vazirlar Mahkamasi tomonidan qat’iy nazorat qilib borilishi belgilanmoqda.

Tashabbus doirasida aholi murojaatlari va aniqlangan muammolarning ijobiy hal etilishi vazirlik va idoralar, shuningdek, ular rahbariyati faoliyatini baholashning asosiy mezonlaridan biri sifatida belgilanishi ko‘zda tutilgan.

Bundan tashqari, “xonadonbay” aniqlangan muammolar ijrosining ta’minlanishi Hisob palatasi va Boshqaruv samaradorligi agentligi tomonidan qat’iy nazoratga olinadi. Nazorat natijalari bo‘yicha har chorakda O‘zbekiston prezidenti administratsiyasiga ma’lumot kiritib borish rejalashtirilmoqda.