O‘zbekistonda Saudiya Arabistonining yangi elchisi ish boshladi

O‘zbekiston tashqi ishlar vaziri Baxtiyor Saidov Saudiya Arabistoni podshohligining O‘zbekistondagi yangi elchisi Saad bin Nosir bin Abdulloh Abu Haymedni qabul qildi. Uchrashuv chog‘ida elchi o‘zining ishonch yorliqlari nusxalarini topshirdi, shu bilan mamlakatdagi diplomatik faoliyati rasman boshlandi.

Qayd etilishicha, so‘nggi yillarda O‘zbekiston va Saudiya Arabistoni o‘rtasidagi munosabatlar siyosiy, savdo-iqtisodiy, investitsiya, energetika va madaniy-gumanitar sohalarda jadal rivojlanib bormoqda. Tomonlar o‘zaro manfaatli hamkorlikni yanada kengaytirish, yangi qo‘shma loyihalarni amalga oshirish hamda aloqalarni sifat jihatdan yangi bosqichga olib chiqish masalalarini muhokama qildi.

Uchrashuvda, shuningdek, savdo hajmini oshirish, investitsiya loyihalarini qo‘llab-quvvatlash, energetika sohasida hamkorlikni kuchaytirish hamda madaniy almashinuvni faollashtirish ustuvor yo‘nalishlar sifatida belgilandi.

Uchrashuv yakunida Baxtiyor Saidov elchiga O‘zbekistondagi diplomatik faoliyati davomida muvaffaqiyatlar tilab, uning faoliyati ikki mamlakat o‘rtasidagi do‘stona munosabatlarni yanada mustahkamlashga xizmat qilishini ta’kidladi.