Andijonda yirik miqdorda giyohvandlik vositasi saqlagan shaxs ushlandi

Narkojinoyatlarga qarshi kurashish yo‘nalishida Andijon viloyatining Jalaquduq tumanida tezkor tadbir o‘tkazildi.

Foto: Videodan kadr

Tadbir davomida 1950 yilda tug‘ilgan, muqaddam sudlangan fuqaro o‘zining yashash xonadonida kelgusida sotish maqsadida yirik miqdorda giyohvandlik vositasini saqlab kelayotganligi aniqlandi.

Tekshiruv jarayonida jami 20 kg 400 gramm “marixuana” giyohvandlik vositasi topilib, ashyoviy dalil sifatida belgilangan tartibda rasmiylashtirib olindi.

Hozirda mazkur holat yuzasidan fuqaroga nisbatan jinoyat ishi qo‘zg‘atilib, surishtiruv-tergov harakatlari olib borilmoqda.