2024 yilda Germaniyaga yangi migrantlar oqimi 12 foizga kamaydi

2024 yilda Germaniyaga kelgan migrantlar soni 2023 yilga nisbatan ancha kamaygan. Umuman olganda, 2024 yilda Germaniya hokimiyatlari GFR hududiga taxminan 1,694 million yangi kelgan chet el fuqarosini qayd etgan. Bu Germaniya federal hukumati migratsiya hisobotidan kelib chiqadi, uning ma’lumotlarini 4 fevral, chorshanba kuni Die Welt nashri e’lon qildi.

Bu ko‘rsatkich 2023 yilga nisbatan 12,3 foizga kam. Shu davr ichida Germaniyani 1,264 million kishi tark etgan. Die Welt yozishicha, 2024 yilda migratsiya saldosi (ya’ni Germaniyaga yashash uchun kelganlar bilan ketganlar o‘rtasidagi farq) taxminan 430 ming kishini tashkil etgan. Ko‘rsatilgan davrda migratsiya saldosi taxminan 35 foizga qisqargan.

Hukumat hisobotida, shuningdek, 2024 yilda Germaniyaga ko‘chib kelganlar orasida Ukraina, Ruminiya, Turkiya, Polsha va Suriyadan kelganlar soni ham kamaygani qayd etilgan — bu davlatlar GFRga ko‘chib keluvchilarning asosiy kelib chiqish mamlakatlari hisoblanadi. Ayni paytda, Germaniyadan eng ko‘p o‘z vataniga qaytganlar Ruminiya fuqarolari bo‘lgan: 2024 yilda u yerga 178 290 kishi ketgan (bu Germaniyani tark etganlar umumiy sonining 14,1 foizi).

Shu bilan birga, 2024 yilda naturalizatsiya — ya’ni chet elliklar tomonidan nemis fuqaroligini olish — 2000 yildan beri statistik hisob yuritila boshlanganidan buyon eng yuqori darajaga chiqqan. Hukumat migratsiya hisobotiga ko‘ra, 2024 yilda 292 020 kishi nemis fuqaroligini olgan — bu 2023 yilga nisbatan 45,9 foizga ko‘p.

Die Welt eslatishicha, bunday keskin o‘sish o‘sha paytdagi “svetofor koalitsiyasi” qabul qilgan fuqarolik to‘g‘risidagi qonun islohoti bilan bog‘liq. Yangi qoidalar mamlakatda yashashning minimal muddatini 8 yildan 5 yilga, alohida integratsiya holatida esa 3 yilgacha qisqartirgan. Tezlashtirilgan fuqarolik berish tartibi esa kansler Fridrix Mers hukumati hokimiyatga kelganidan keyin bekor qilingan.

Umuman olganda, 2024 yilda Germaniya aholisi tarkibida xorijliklar ulushi taxminan 12,4 million kishigacha, ya’ni mamlakat umumiy aholisining 14,8 foizigacha oshgan. Hukumat hisobotiga ko‘ra, bu 1990 yildan beri eng yuqori ko‘rsatkich hisoblanadi.