2024 йилда Германияга янги мигрантлар оқими 12 фоизга камайди

Германия федерал ҳукуматининг янги ҳисоботига кўра, 2024 йилда ГФРга янги келган мигрантлар оқими олдинги йилга нисбатан сезиларли даражада қисқарган. Шу билан бирга, 2024 йил немис фуқаролигини олиш сони бўйича рекорд йил бўлган.

Фото: Marcus Brandt/dpa/picture alliance

2024 йилда Германияга келган мигрантлар сони 2023 йилга нисбатан анча камайган. Умуман олганда, 2024 йилда Германия ҳокимиятлари ГФР ҳудудига тахминан 1,694 миллион янги келган чет эл фуқаросини қайд этган. Бу Германия федерал ҳукумати миграция ҳисоботидан келиб чиқади, унинг маълумотларини 4 феврал, чоршанба куни Die Welt нашри эълон қилди.

Бу кўрсаткич 2023 йилга нисбатан 12,3 фоизга кам. Шу давр ичида Германияни 1,264 миллион киши тарк этган. Die Welt ёзишича, 2024 йилда миграция салдоси (яъни Германияга яшаш учун келганлар билан кетганлар ўртасидаги фарқ) тахминан 430 минг кишини ташкил этган. Кўрсатилган даврда миграция салдоси тахминан 35 фоизга қисқарган.

Ҳукумат ҳисоботида, шунингдек, 2024 йилда Германияга кўчиб келганлар орасида Украина, Руминия, Туркия, Полша ва Суриядан келганлар сони ҳам камайгани қайд этилган — бу давлатлар ГФРга кўчиб келувчиларнинг асосий келиб чиқиш мамлакатлари ҳисобланади. Айни пайтда, Германиядан энг кўп ўз ватанига қайтганлар Руминия фуқаролари бўлган: 2024 йилда у ерга 178 290 киши кетган (бу Германияни тарк этганлар умумий сонининг 14,1 фоизи).

Шу билан бирга, 2024 йилда натурализация — яъни чет элликлар томонидан немис фуқаролигини олиш — 2000 йилдан бери статистик ҳисоб юритила бошланганидан буён энг юқори даражага чиққан. Ҳукумат миграция ҳисоботига кўра, 2024 йилда 292 020 киши немис фуқаролигини олган — бу 2023 йилга нисбатан 45,9 фоизга кўп.

Die Welt эслатишича, бундай кескин ўсиш ўша пайтдаги “светофор коалицияси” қабул қилган фуқаролик тўғрисидаги қонун ислоҳоти билан боғлиқ. Янги қоидалар мамлакатда яшашнинг минимал муддатини 8 йилдан 5 йилга, алоҳида интеграция ҳолатида эса 3 йилгача қисқартирган. Тезлаштирилган фуқаролик бериш тартиби эса канцлер Фридрих Мерц ҳукумати ҳокимиятга келганидан кейин бекор қилинган.

Умуман олганда, 2024 йилда Германия аҳолиси таркибида хорижликлар улуши тахминан 12,4 миллион кишигача, яъни мамлакат умумий аҳолисининг 14,8 фоизигача ошган. Ҳукумат ҳисоботига кўра, бу 1990 йилдан бери энг юқори кўрсаткич ҳисобланади.