Qurilish inspeksiyasi quruvchilarga ogohlantirish bilan chiqdi

Qayd etilishicha, qurilish obektidan chiqayotgan barcha texnika vositalari obektda belgilangan maxsus yuvish joylarida yuvilgan holda hududdan chiqarilishi shart. Bu talab atrof-muhitni muhofaza qilish, shahar ko‘chalarining ifloslanishini oldini olish hamda sanitar holatga salbiy ta’sir ko‘rsatilishini bartaraf etishga qaratilgan.

Ma’lumotga ko‘ra, mazkur talablarga rioya etilmagan taqdirda, Ma’muriy javobgarlik to‘g‘risidagi kodeksning 99-moddasi asosida:

• jismoniy shaxslarga — BHMning 30 baravari;
• mansabdor shaxslarga — BHMning 70 baravari miqdorida jarima tayinlanadi.

Shuningdek, ushbu talablarni bajarmaslik qurilish obektida olib borilayotgan ishlarini vaqtincha to‘xtatib qo‘yish uchun ham yetarli asos bo‘lishi mumkin.

Inspeksiya fuqarolarni bunday qonunbuzilish holatlariga duch kelganda 71-200-69-02 raqamli koll-markazga xabar berishga chaqirdi.