Putin yana ikki yil urushishni rejalashtirmoqda – NYT

Ukrainaning Donbass hududini to‘liq bosib olish uchun Rossiyaga yana ikki yil kerak. Kremldagilar bu hisob-kitoblar bilan tanish va urushni shu ssenariy bo‘yicha davom ettirishga rozi ko‘rinadi.

The New York Times gazetasining yozishicha, G‘arb razvedka ma’lumotlariga ko‘ra, Vladimir Putin Ukraina bilan urushda g‘alaba qozonayotganiga ishonmoqda.

«U Donbass ustidan to‘liq nazorat o‘rnatish uchun 18 oydan ikki yilgacha vaqt kerak bo‘lsa ham, Rossiya raketalari va dronlari energetika infratuzilmasi va turar-joy binolariga zarba bergan har bir jang kuni va har bir tun unga ko‘proq ustunlik berishiga ishonchi komil», deyiladi maqolada.

Shu bilan birga, nashrning ta’kidlashicha, so‘nggi oylarda Rossiya iqtisodiyoti chuqur muammolarga duch kelmoqda, Donald Tramp esa urush tugagan taqdirda Kremlga Rossiyaga katta sarmoya kiritishni taklif qilmoqda.

«Bunday dinamikani hisobga olgan holda, ba’zi tahlilchilar Putin hali ham Ukrainadagi jangovar harakatlarni to‘xtatish bo‘yicha kelishuv tuzishi mumkinligini taxmin qilmoqda, ayniqsa u Qo‘shma Shtatlar bilan uzoq muddatli yaqinlashuvni va Ukraina qo‘shinlarini Donbassning qolgan qismidan olib chiqishni ta’minlasa», deb yozdi NYT.