AQSh elchixonasi xodimlariga Isroilni tark etishga ruxsat berildi

Quddusdagi AQSh elchixonasi va uning Tel-Avivdagi bo‘linmasi xodimlari — ishi diplomatik missiyaning muhim vazifalari bilan bog‘liq bo‘lmaganlar, shuningdek, ularning oila a’zolari xavfsizlikka tahdid tufayli Isroildan chiqib ketishi mumkin. Bu haqda 27 fevral, juma kuni elchixona AQSh Davlat departamentining tegishli ruxsatiga tayanib xabar qildi.

“Tijoriy reyslar hali mavjud ekan, Isroildan chiqib ketish variantini ko‘rib chiqish mumkin”, — deyiladi tavsiyada.

Xabarda ta’kidlanishicha, “xavfsizlik bilan bog‘liq hodisalar”ga javoban va “oldindan ogohlantirmasdan” AQSh elchixonasi qo‘shimcha ravishda ushbu shaxslarning Isroilning bir qator hududlariga, Quddusdagi Eski shaharga va Iordan daryosining G‘arbiy sohiliga safarlarini yanada cheklashi yoki butunlay taqiqlashi ham mumkin.

“Terrorizm va fuqarolik tartibsizliklari” sabab Isroilga va G‘arbiy sohilga safarlardan voz kechish tavsiya etilgan. G‘azo sektoriga, shuningdek mazkur hududdan 11,3 km radiusdagi hududlarga ham — “terrorizm va qurolli mojaro” sabab bormaslik tavsiya qilinadi. Qaror Livan va Suriya bilan chegaralardan 4 km radiusdagi Shimoliy Isroilga ham (“davom etayotgan harbiy ishtirok” sabab), shuningdek Misr bilan chegaradan 2,4 km radiusdagi hududlarga ham tatbiq etiladi — Taba ochiq chegara punkti bundan mustasno.

“Terroristik guruhlar, yolg‘iz terroristlar va boshqa ekstremistlar Isroilda, G‘arbiy sohilda va G‘azoda ehtimoliy hujumlarni rejalashtirishda davom etmoqda”, — deb ta’kidladi diplomatik missiya. U yerda turistik obektlar, transport tugunlari, bozorlar, savdo markazlari va mahalliy davlat muassasalariga hujumlar bo‘lishi mumkinligi istisno qilinmadi. “Mintaqaviy keskinlikning kuchayishi Isroilga va Isroildan aviareyslarning bekor qilinishiga va/yoki ular soni qisqarishiga olib kelishi mumkin”, — deb ogohlantirdi elchixona. Bayonot AQSh va Eron o‘rtasida Tehronning yadroviy dasturi bo‘yicha muzokaralarning navbatdagi raundi yakunlanganidan keyin e’lon qilindi.

AQSh va Eron Eron yadroviy dasturi bo‘yicha muzokaralarni fevral oyi boshida Ummon vositachiligida qayta tiklagan — bu 2025 yil iyun oyida Isroil va Eron o‘rtasida bo‘lib o‘tgan o‘n ikki kunlik urushdan keyin ilk bor yuz berdi. Navbatdagi raund 26 fevral kuni Jyenevada yakunlandi.

AQSh delegatsiyasi tarkibida Donald Trampning maxsus vakili Stiven Uitkoff va AQSh prezidenti kuyovi Jared Kushner bo‘lgan. Eron tomonidan uchrashuvda mamlakat tashqi ishlar vaziri Abbos Arag‘chi ishtirok etgan.

Axios xabar berishicha, tomonlar 26 fevral kuni ertalab va kechqurun ikki sessiyada muzokara olib borgan. Nashr ma’lumotiga ko‘ra, ertalabki uchrashuvdan keyin AQSh delegatsiyasi “hafsalasi pir bo‘lgan”, biroq kechqurungi yig‘ilishni Uitkoff va Kushner “ijobiy” deb baholagan.

Qatarning “Al-Jazira” telekanali ma’lumotiga ko‘ra, ertalabki sessiyada Eron AQSh bilan yadroviy kelishuv bo‘yicha o‘z loyihasini taqdim etgan. Manbalar aytishicha, Tehron uran boyitishni faqat vaqtincha to‘xtatishga tayyor va yadroviy obektlarni demontaj qilishdan bosh tortyapti. Eron hokimiyati uran zaxiralarini past darajagacha qisqartirishga hamda yadroviy obektlarga AEXA (IAEA) vakillarini kiritishga tayyor.

CNN muxbiri Eron delegatsiyasiga yaqin manbalarga tayanib, Eron AQSh bilan faqat barcha Amerika sanksiyalari va BMT Xavfsizlik kengashi rezolyutsiyalari bekor qilinsa, kelishuvga borishi mumkinligini aytdi.

Muzokaralar fonida AQSh mintaqadagi harbiy ishtirokini keskin kuchaytirdi. Prezident Donald Tramp u yerga ikkinchi aviatashuvchi, shuningdek qo‘shimcha kemalar va aviatsiya yuborishni buyurdi. Tehronga nisbatan keskin ogohlantirish bilan Isroil bosh vaziri Binyamin Netanyahu ham chiqdi.