Isroil Eronga zarba berdi

Xabarlar fonida Tehron markazida portlash sodir bo‘lgani va portlash joyidan qalin tutun ko‘tarilgani aytilmoqda. Eron davlat televideniyesi portlash bo‘lganini tasdiqlagan.

Eron OAVga ko‘ra, shahar markazida uchta portlash ovozi eshitilgan.

Eronning Fars News Agency axborot agentligi ma’lum qilishicha, poytaxtning “Respublika” hududiga bir nechta raketa kelib tushgani haqida xabarlar mavjud.

Rasmiy idoralar hozircha qurbonlar yoki vayronagarchilik ko‘lami haqida aniq raqamlar e’lon qilmagan.

Bir vaqtning o‘zida Isroilning turli hududlarida havo xavf-sirenalari yangragan. Isroil harbiylari buni aholini ehtimoliy raketa zarbalariga tayyorlash uchun “proaktiv ogohlantirish” deb izohlagan.

Isroil mudofaa vaziri hujum “tahdidlarni bartaraf etish” maqsadida qilinganini aytgani, biroq nishonga olingan obektlar haqida hozircha batafsil ma’lumot berilmagani qayd etilgan.

Portlashning aniq sababi va hujum qaysi obektlarga qaratilgani haqida mustaqil tasdiqlangan to‘liq ma’lumot hali yo‘q.

Tehron tomonidan (Eron rasmiylaridan) keng ko‘lamli, to‘liq bayonotlar keyinroq chiqishi kutilmoqda.

Bu voqea mintaqa xavfsizligi uchun keskin eskalatsiya bo‘lishi mumkin. Ayrim OAV bu hodisa AQSh–Eron o‘rtasidagi yadro dasturi bo‘yicha taranglik va mintaqada harbiy-siyosiy bosim kuchaygan sharoitda ro‘y berganini yozmoqda.