Davlat dumasida mobil internet va Wi-Fi yo‘qolib qoldi

Moskvada va butun Rossiya bo‘ylab internet keng ko‘lamda bloklanayotgan sharoitda Davlat dumasida mobil aloqa va simsiz internet (Wi-Fi) yo‘qoldi. 12 mart, payshanba kuni shahar markazidagi Oxotniy ryadda joylashgan binoda ochiq ham, parol bilan himoyalangan simsiz tarmoq ham to‘liq ishlamay qoldi, deb xabar berdi Duma Iqtisodiy siyosat qo‘mitasi raisi o‘rinbosari Mixail Delyagin o‘zining Telegram-kanalida.

“Kecha ham u barcha telefonlarda ishlamadi, endi esa har ikki tarmoqning o‘zi (bittasi hamma uchun, ikkinchisi parol bilan — kecha u ham yo‘q edi) umuman mavjud emas”, — deb yozdi Delyagin. U, shuningdek, Davlat dumasi binosida onlayn-servislarning birortasi, jumladan hokimiyat ruxsat bergan Max davlat messenjeri ham ishlamayotganini ma’lum qildi. Deputat u bilan bog‘lanmoqchi bo‘lganlardan SMS xabar yozishni so‘radi.

Davlat dumasidan internetga chiqishning barcha imkoniyatlari yo‘qolgani haqida “Vedomosti” gazetasi ham quyi palatadagi manbalariga tayanib yozdi. Xususan, yalpi majlisda KPRF fraksiyasi deputatlari elektron pochtani tekshirish imkoni yo‘qligidan shikoyat qildi. Ular, shuningdek, xizmat telefonlari ham ishlamayotganini aytdi.

Davlat dumasi spikeri Vyacheslav Volodin internetdagi uzilishlarni “xavfsizlik masalalari” bilan bog‘ladi va Axborot siyosati qo‘mitasi rahbari Sergey Boyarskiyga murojaat qilishni so‘radi.

Rossiya hukumati 2025 yil bahoridan boshlab Ukraina dronlari hujumlari sababli mobil tarmoqlarni muntazam ravishda o‘chira boshladi. O‘tgan yil davomida internet-shatdaunlar soni bo‘yicha yangi rekordlar qayd etildi. Internetdagi uzilishlar jang harakatlari hududidan juda uzoqda joylashgan mintaqalarga ham taalluqli bo‘ldi (Primore, Saxalin, Kamchatka).

Mart oyi boshidan beri Moskvada mobil aloqa bilan bog‘liq keng ko‘lamli muammolar kuzatilmoqda. Mobil internet ishlamay qolgan, turli servislarga kirishda uzilishlar qayd etilmoqda. “Kommersant” manbalariga ko‘ra, aloqa operatorlariga ayrim joylarda mobil internet ishini cheklash haqida ko‘rsatma berilgan. “Kod Durova” manbasi aniqlik kiritishicha, Moskvadagi o‘chirishlar muayyan hududlarda amal qilmoqda. Uning so‘zlariga ko‘ra, tumanning bir qismida tarmoq ishlashi mumkin, bir necha ko‘cha narida esa u butunlay yo‘q.

Bundan oldin Roskomnadzor Rossiyada Telegram ishini maqsadli ravishda sekinlashtirish niyatini rasman tasdiqlagan edi. Idorada “izchil cheklovlar” joriy etish rejalashtirilayotgani aytildi. Rasman regulyator bu choralarni “Rossiya qonunchiligi buzilishi” va “fuqarolar xavfsizligi”ga tahdid bilan izohladi. Internet-senzura bo‘yicha ekspertlar esa hukumatning asl maqsadi — WhatsApp misolida bo‘lgani kabi, Telegram’ni asta-sekin siqib chiqarish uchun sharoit yaratish va Rossiyadagi foydalanuvchilarni davlat nazoratidagi messenjerlarga, avvalo Max va VK’ga o‘tkazish, deb hisoblaydi.