Moskva birjasi indeksi 2022 yildan beri ilk bor 2000 punktdan pastladi

Rossiya fond bozorida keskin pasayish kuzatildi. 16 iyul yakuniga ko‘ra, Moskva birjasi indeksi 5,7 foizga tushib, 2022 yil oktyabridan beri birinchi marta 2000 punktdan past darajaga tushdi. Shu bilan birga, «Gazprom» aksiyalari 2008 yildan beri kuzatilmagan eng past qiymatga yaqinlashdi.

Foto: RIA Novosti / v mediabank Zdaniye Moskovskoy birji.

Moskva birjasi ma’lumotlariga ko‘ra, kun yakunida barcha savdo sessiyalarini hisobga oluvchi IMOEX2 indeksi 1991,42 punktni tashkil etdi. Bu ko‘rsatkich 2022 yil 20 oktyabridan beri ilk bor 2000 punktlik chegaradan pastga tushganini anglatadi.

Asosiy savdo sessiyalarini qamrab oluvchi IMOEX indeksi ham 16 iyul savdolari yakunlariga ko‘ra 4,24 foizga pasayib, 2022,27 punktga yetdi. Bu 2022 yil sentabridan beri qayd etilgan eng katta kunlik pasayishlardan biri bo‘ldi.

Kun davomida eng katta yo‘qotishlarni VK, «Polyus», «Surgutneftegaz», «Rusal» va «Sistema» AFK aksiyalari qayd etdi. Xususan, VK aksiyalari kompaniyaning Max messenjeri va «VKontakte» ilovasi Google Play platformasidan olib tashlangani haqidagi xabarlar ortidan keskin arzonlashdi.

Shuningdek, «Gazprom» aksiyalari bir donasi 83,98 rublgacha tushdi. Bu kompaniya qimmatli qog‘ozlari uchun tarixiy minimumga yaqin ko‘rsatkich hisoblanadi. Bundan avval eng past narx 2008 yil oktyabrida qayd etilgan edi.

Tahlillarga ko‘ra, Moskva birjasi indeksi joriy yil mart oyida 2904,39 punktgacha ko‘tarilgan bo‘lsa, shundan buyon uning qiymati 31 foizdan ortiqqa kamaygan.

DW qayd etishicha, fond bozoridagi uzoq davom etayotgan pasayish Rossiya iqtisodiyotidagi muammolar fonida kechmoqda. Xususan, Ukraina qurolli kuchlarining dronlar yordamida neftni qayta ishlash zavodlari va yonilg‘i-energetika infratuzilmasiga bergan zarbalari ortidan neft ishlab chiqarish hajmi qisqargani va mamlakatda yonilg‘i ta’minoti bilan bog‘liq qiyinchiliklar yuzaga kelgani aytilmoqda.

Bundan tashqari, Reuters agentligi hisob-kitoblariga ko‘ra, 2026 yil yakunlarida Rossiya federal budjeti xarajatlari va taqchilligi rasmiy rejada ko‘rsatilganidan 1 trillion rubldan ortiqqa oshib ketishi mumkin. Agentlik bahosiga ko‘ra, budjet xarajatlari 45,11 trillion rublni tashkil etadi, daromadlar esa 40,28 trillion rubl darajasida qolishi kutilmoqda. Natijada budjet taqchilligi avval rejalashtirilgan 3,79 trillion rubl o‘rniga 4,83 trillion rublga yetishi mumkin.