Rossiyada qo‘lga olingan voyaga yetmagan o‘zbekistonlik vatanga qaytarildi

Rossiyada mehnat qilayotgan vatandosh murojaati asosida qo‘lga olingan voyaga yetmagan o‘zbekistonlik elchixona ko‘magida vatanga qaytarildi. Ma’lum qilinishicha, bola Moskvadagi voyaga yetmaganlar uchun mo‘ljallangan ijtimoiy reabilitatsiya markazlaridan biriga joylashtirilgan.

Foto: “Dunyo” AA

O‘zbekistonning Rossiyadagi elchixonasi konsullik bo‘limi mazkur holat bo‘yicha zudlik bilan ishga kirishib, tegishli tashkilotlar va vakolatli idoralar bilan hamkorlik aloqalarini o‘rnatdi. Diplomatlar bolaning huquq va qonuniy manfaatlarini himoya qilish hamda uni oilasiga qaytarish choralarini ko‘rdi.

Ko‘rilgan chora-tadbirlar natijasida voyaga yetmagan fuqaro oilaning ishonchli vakiliga topshirilib, sog‘-salomat O‘zbekistonga olib kelindi.

Elchixona Rossiya hududidagi vatandoshlar, ayniqsa, voyaga yetmaganlarning xavfsizligi va huquqlarini ta’minlash masalalariga alohida e’tibor qaratishda davom etmoqda.

Shu munosabat bilan fuqarolarga farzandlarini nazoratsiz qoldirmaslik, murakkab vaziyatlarda esa o‘z vaqtida diplomatik vakolatxonalarga murojaat qilish tavsiya etildi.