Reuters: Eronning yangi rahbari deeskalatsiya bo‘yicha takliflarni rad etdi

Eronning yangi oliy rahbari Mujtaba Xominaiy Yaqin Sharqdagi mojaroni yumshatish bo‘yicha, Tehronga ikki vositachi davlat vakillari orqali yetkazilgan takliflarni rad etdi. Bu haqda 17 mart, seshanba kuni Reuters agentligi yuqori lavozimli eronlik amaldorga tayanib xabar qildi.

Agentlik suhbatdoshining, ismi sir saqlangan holda aytgan so‘zlariga ko‘ra, Xominaiy Eron AQSh va Isroildan “qattiq va jiddiy” qasos olishi kerak, deb hisoblaydi. Bu pozitsiya u yangi oliy rahbar etib tayinlanganidan keyin tashqi siyosat bo‘yicha o‘tkazilgan birinchi yig‘ilishda bayon qilingan. Shu bilan birga, u uchrashuvda shaxsan ishtirok etgan-etmaganiga aniqlik kiritilmagan.

Mujtaba Xominaiy 8 mart kuni tayinlanganidan buyon jamoatchilik oldida ko‘ringani yo‘q. Xominaiyning xalqqa qaratilgan 12 martdagi birinchi murojaati matnini Eron davlat telekanali boshlovchisi o‘qib eshittirgan.

Vositachilar orqali yetkazilgan “keskinlikni pasaytirish yoki o‘t ochishni to‘xtatish” haqidagi takliflarga javoban, Eron rahbari “to Qo‘shma Shtatlar va Isroil tiz cho‘ktirilmagunicha, mag‘lubiyatni tan olmagunicha va tovon to‘lamagunicha, tinchlik uchun munosib vaqt bo‘lmaydi”, deb bildirgan, dedi eronlik amaldor.

Bundan oldin diplomatik sa’y-harakatlardan xabardor Reuters manbalari AQSh prezidenti Donald Tramp ma’muriyati Yaqin Sharqdagi ittifoqchilarning Eron bilan urushni to‘xtatish bo‘yicha muzokaralarni boshlash takliflarini qaytarganini xabar qilgan edi. Shu bilan birga, Tehron AQSh va Isroil tomonidan berilayotgan zarbalar to‘xtamagunicha har qanday sulh imkoniyatini rad etmoqda.