AQSh yadro arsenali haqidagi ma’lumotlarni oshkor qildi

AQSh Mudofaa vazirligi ixtiyorida ballistik raketalar va strategik bombardimonchi samolyotlar bilan yetkazib berish uchun mo‘ljallangan 3,7 mingga yaqin yadroviy o‘q-dorilar zaxirasi mavjud. 2026 yil fevral oyidagi ma’lumotlar Amerika olimlari federatsiyasi (FAS) tadqiqotida keltirilgan.

O‘q-dorilar soni o‘tgan yilga nisbatan o‘zgarishsiz qoldi. 3,7 mingta jangovar kallakdan atigi 1,77 mingga yaqini raketalarda joylashtirilgan, 1,93 mingga yaqini esa zaxirada. Quroldan yechib olingan yana 1,34 ming jangovar kallak utilizatsiya qilinishini kutmoqda. Ular bilan birga AQSh yadro qurolining umumiy hajmi 5 ming donaga yetadi.

Jangovar kallaklardan 400 tasi Montana, Shimoliy Dakota va Vayomingdagi bazalarda Minuteman III qit’alararo ballistik raketalarida (QBR) joylashtirilgan, 970 ga yaqini ballistik raketalar bilan suv osti kemalarida. Bundan tashqari, AQShdagi strategik aviatsiya bazalarida 300 ta, Turkiya, Italiya, Belgiya, Germaniya va Niderlandiyadagi Yevropa bazalarida 100 ga yaqin taktik yadroviy bombalar saqlanmoqda.

FAS ta’kidlashicha, AQSh yadroviy triadaning uchta tarkibiy qismiga ham ta’sir ko‘rsatadigan keng ko‘lamli yadroviy kuchlarni modernizatsiya qilish dasturini boshlagan. Yaqin o‘n yilliklarda raketa tizimining har bir elementi yangi versiyalarga almashtiriladi.

2026 moliyaviy yil uchun budjet so‘rovi strategik yadroviy kuchlar va yadroviy infratuzilma uchun qariyb 60 milliard dollar ajratishni nazarda tutadi. Kongress $2 mlrd miqdorida qo‘shimcha moliyalashtirishni ma’qulladi.