Eronda armiyaga chaqiruv yoshi 12 yoshdan etib belgilandi - OAV

Eronda armiyaga chaqiriluvchilarning minimal yoshi 12 yosh etib belgilandi. Bu haqda Islom inqilobi qo‘riqchilari korpusi rahbari o‘rinbosari Rahim Nadaliy ma’lum qildi, deb xabar berdi Al Arabiya telekanali.

Telekanal ma’lumotiga ko‘ra, 12 yoshli bolalar razvedka va operativ qo‘riqlashga, “Basij” nazorat-o‘tkazuv punktlaridagi ishlarga, askarlarga ovqat tayyorlash, yaradorlarga qarashga jalb etiladi.

Qayd etilishicha, bu Eronning harbiy operatsiyalarda bolalardan foydalanishni taqiqlash bo‘yicha xalqaro majburiyatlariga zid hisoblanadi.

Avvalroq AQSh qurolli kuchlari markaziy qo‘mondonligi (CENTCOM) matbuot xizmati 3,5 ming nafarga yaqin Amerika dengizchilari va dengiz piyoda qo‘shinlari Yaqin Sharqqa yetib kelganini xabar qilgandi.

OAVning yozishicha, AQSh Eronga qarshi quruqlikdagi operatsiyani boshlashga tayyorlanmoqda.