«Artemida-2» missiyasi ekipaji Oyga sayohatdan ilk suratlarni namoyish etdi

Fazogirlar Yer va uning yo‘ldoshini, shuningdek, bir-birini kadrlarga muhrlagan.

3 aprel kuni, AQSh Sharqiy sohil vaqti bilan soat 19:49 da (Toshkent vaqti bilan 4 aprel kuni 04:49 da), «Orion» kosmik kemasi dvigatellari «translunar inʼeksiya impulsi»ni amalga oshirdi – bu kemani Yer atrofidagi orbitadan Oy sari parvoz trayektoriyasiga o‘tkazish uchun tezlanish beradigan manyovrdir. Jarayon 5 daqiqayu 55 soniya davom etdi. Shundan keyin kema Oy tomon yo‘l oldi.

Bu 1972 yilgi «Apollon-17» missiyasidan beri insoniyat Yer orbitasini qayta tark etishi bilan bog‘liq ilk holatdir.

Ekipaj tarkibidan NASA astronavtlari Rid Uayzman, Viktor Glover va Kristina Kox, shuningdek, Kanada kosmik agentligi astronavti Jyeremi Hansen o‘rin olgan.

6 aprel kuni ekipaj olti soatlik seans davomida Oy sirtini kuzatish seansini o‘tkazadi. «Artemida-2» nomini olgan missiya 10 kun davom etadi – «Orion» Oy atrofini aylanib chiqadi va shundan keyin Yerga qaytadi.

Astronavtlar Yer yo‘ldoshiga qo‘nmaydi: ularning asosiy vazifasi – kosmik kemaning boshqaruv tizimlarini sinovdan o‘tkazish va barchasi uzoq koinot sharoitida ishlashiga ishonch hosil qilishdan iborat.

Ekipaj allaqachon Yer va Oyning «Orion» bortida turib olingan ilk suratlari bilan bo‘lishdi, shuningdek, kosmik kemada kunlar qanday o‘tayotganini namoyish etishdi. Quyida mazkur kadrlar keltiriladi.