7 mlrdlik zarar: Navoiyda oltin qazuvchilar ushlandi

Davlat xavfsizlik xizmati va ichki ishlar organlari xodimlari tomonidan o‘tkazilgan tadbirda, davlat zaxirasidagi yerlarda oltin saqlovchi rudalarni noqonuniy qazib olib, ularni kimyoviy qayta ishlash bilan shug‘ullangan guruh faoliyatiga chek qo‘yildi.

Tergov ma’lumotlariga ko‘ra, ushbu guruhga Samarqand viloyati Paxtachi tumanida yashovchi 1988 yilda tug‘ilgan shaxs boshchilik qilgan. U Karmana tumanidagi parrandachilik xo‘jaligi binosini ijaraga olib, yashirin sex tashkil etgan.

Tezkor tadbir davomida 200 kg yarim tayyor oltin, 200 qopda oltin moddasi mavjud qum va toshlar, 300 kg kimyoviy vositalar, maxsus laboratoriya jihozi, gaz ballonlari va boshqa asbob-uskunalar ashyoviy dalil sifatida olindi.

Shuningdek, Navbahor tumanida aniqlangan yana bir holatda mahalliy MChJ rahbari soxta ruxsatnoma asosida “Sarmishsoy” davlat muzey-qo‘riqxonasi hududida 19 nafar shaxsni jalb etgan holda oltin qazib olish ishlarini tashkil etgani ma’lum bo‘ldi.

Ushbu holat bo‘yicha 6 kg yarim tayyor oltin, 430 tonnadan ortiq oltin saqlovchi rudalar, kimyoviy vositalar, yuk avtomobillari va maxsus texnikalar musodara qilindi. Dastlabki hisob-kitoblarga ko‘ra, 6,1 mlrd so‘mlik qazilma boyliklar talon-toroj qilingan.

Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda. Shu bilan birga, ekologiya va atrof-muhitga yetkazilgan zarar miqdori aniqlanmoqda.