Navoiyda kuchli sel keldi. Talafotlar bor

Navoiy viloyati Xatirchi tumanida kuchli sel oqimlari kuzatildi. Hodisa guvohlarining Kun.uz'ga xabar berishicha, jiddiy talafotlar bor.

Holat eks etgan videolarda sel mashinalarni oqizib ketganini, yo‘lga zarar yetkazganini ko‘rish mumkin. Guvohlardan biri bitta uy qulaganini ham aytib o‘tgan.

“Qishlog‘imizga kirish va chiqishdagi asosiy ikkita yo‘lni ham sel bosdi. Yo‘llar yaroqsiz holga kelmagan bo‘lsin, deb turibmiz. Yo‘qsa, qishloqqa kirib-chiqish ma’lum muddat cheklanib qolishi mumkin”, deydi Kun.uz bilan gaplashgan Langar qishlog‘ida yashovchi guvohlardan biri.

Navoiy viloyati Favqulodda vaziyatlar boshqarmasining ma’lum qilishicha, Xatirchi, Karmana va Nurota tumanlarining ayrim hududlarida sel oqimlari kuzatilib, 2 ta mashina, 5 bosh yirik shoxli mol sel oqimida oqib ketgan. 7 ta xonadon tomorqa hududlariga suv kirgani aniqlangan.

“Oqibatlarni bartaraf etish ishlariga jami 37 ta maxsus texnika va 173 nafar shaxsiy tarkib jalb etilgan. Fuqarolar orasida tan jarohati olganlar va halok bo‘lganlar qayd etilmadi”, deyiladi xabarda.

Favqulodda vaziyatlar vazirligiga ko‘ra, Xatirchi tumanida avtomobil yo‘lining bir qismi xarsang toshlar bilan to‘silib qolishi oqibatida 7 ta mashina va bir nechta uy-joylar sel oqimlaridan zarar ko‘rgan.

Aholi xavfsizligini ta’minlash maqsadida Angidon, Langar, Kattasoy va Maydon soylari yaqinida yashovchi aholi vaqtinchalik xavfsiz hududga ko‘chirilgan.

Ayni paytda vaziyat to‘liq nazoratga olingan bo‘lib, hududlarda monitoring ishlari davom ettirilmoqda, deyiladi FVV xabarida.

Avvalroq Qashqadaryoda 25 yoshli yigit sel oqizib ketishi oqibatida halok bo‘lgandi.