Rossiya va Ukraina vaqtinchalik sulh e’lon qildi

Rossiya «Ikkinchi jahon urushidagi g‘alaba» sharafiga 8 va 9 may kunlari Ukrainadagi urush bo‘yicha sulh e’lon qildi. Bu haqda Rossiya mudofaa vazirligi xabar berdi. Qaror prezident Vladimir Putin tomonidan qabul qilingan.

«Umid qilamizki, Ukraina tomoni tashabbusimizga qo‘shiladi», deyiladi vazirlik xabarida.

Shu bilan birga, vazirlik qo‘shimcha qilishicha, agar Ukraina G‘alaba kunini nishonlashga to‘sqinlik qilishga urinsa, Rossiya qo‘shinlari bunga javoban «Kiyev markaziga ommaviy raketa hujumi uyushtiradi».

O‘z navbatida, Ukraina prezidenti Volodimir Zelenskiy 6 may yarim tundan boshlab sulh e’lon qildi.

«Biz inson hayoti har qanday yubiley bayramidan beqiyos darajada qadrliroq deb hisoblaymiz. Shuning uchun biz 5 maydan 6 mayga o‘tar kechasidan boshlab sulh e’lon qilamiz», deb xabar berdi u.

Uning so‘zlariga ko‘ra, Kiyev sulh shartlari bo‘yicha Rossiyadan hech qanday rasmiy so‘rov olmagan.