Rossiyada migrantlarni chiqarib yuborish bo‘yicha yangi qoidalar ma’qullandi

Xorijiy fuqarolar chiqarib yuborilishi mumkin bo‘lgan ma’muriy huquqbuzarliklar ro‘yxati ikki baravarga - Ma’muriy javobgarlik to‘g‘risidagi kodeksning 22 ta moddasidan 43 tagacha kengaytirildi.

Foto: Ijtimoiy tarmoqlar

Rossiya Davlat Dumasi 13 may kuni migratsiya siyosatini sezilarli darajada kuchaytiradigan ikkita qonun loyihasini birinchi o‘qishda ma’qulladi.

Majlisda Davlat Dumasi raisi Vyacheslav Volodinning aytishicha, ushbu qonun loyihalari «migratsiya siyosatini yanada takomillashtirishga» qaratilgan.

Uning so‘zlariga ko‘ra, ulardan biri «Rossiya hududida yoki uning tashqarisida har qanday jinoyat sodir etgani uchun» sudlanganligi olib tashlanmagan yoki tugallanmagan chet elliklarga jinoyatning og‘irligidan qat’i nazar Rossiya fuqaroligini, yashash guvohnomasi yoki vaqtincha yashash ruxsatnomasini olishni taqiqlaydi.

«Shuningdek, bunday holatda ilgari berilgan vaqtinchalik yashash ruxsatnomasi yoki yashash guvohnomasini bekor qilish ham taklif etilmoqda», deb qo‘shimcha qildi Volodin.

Ikkinchi qonun loyihasi - «Xorijiy fuqarolar chiqarib yuborilishi mumkin bo‘lgan ma’muriy huquqbuzarliklar ro‘yxatini ikki baravarga - Ma’muriy javobgarlik to‘g‘risidagi kodeksning 22 ta moddasidan 43 tagacha kengaytirish to‘g‘risida».

Chiqarib yuborish uchun yangi asoslar qatoriga siyosiy faollik va pozitsiyani ifodalash bilan bog‘liq moddalar ham kiritilgan. Gap, xususan, Rossiya armiyasini «obro‘sizlantirish», Rossiyaga qarshi sanksiyalarni joriy etish yoki saqlab qolishga chaqirish, natsistik yoki ekstremistik ramzlarni namoyish etish, ekstremistik materiallarni tarqatish, shuningdek, ommaviy axborot vositalari erkinligini suiiste’mol qilish haqida bormoqda.

Bundan tashqari, kelishilmagan aksiyalarda ishtirok etish, favqulodda yoki harbiy holat rejimini buzish, transport infratuzilmasiga xalaqit berish va politsiyaga bo‘ysunmaslik bilan bog‘liq mayda bezorilik ham deportatsiya uchun asos bo‘lishi mumkin.

Tashabbus mualliflari keskinlashtirish zarurligini chet el fuqarolari o‘rtasidagi huquqbuzarliklar sonining ko‘payishi bilan izohlamoqda. Davlat Dumasi spikeri Vyacheslav Volodinning so‘zlariga ko‘ra, 2025 yilda Rossiyadan 72 mingga yaqin migrant chiqarib yuborilgan.