Toshkentda 40 ta zamonaviy AYoQSh qurish rejalashtirilmoqda

Toshkent shahrida davlat-xususiy sheriklik asosida 40 ta zamonaviy avtomobillarga yonilg‘i quyish shoxobchasini barpo etish rejalashtirilmoqda. Tegishli manzilli ro‘yxat xalq deputatlari Toshkent shahar kengashi qarori bilan tasdiqlandi.

Foto: Kun.Uz

Qarorga muvofiq, poytaxtning turli tumanlarida davlat-xususiy sheriklik (DXSh) asosida amalga oshiriladigan infratuzilma loyihalarining manzilli ro‘yxati tasdiqlangan.

Unga ko‘ra, Sergeli, Bektemir, Chilonzor, Yangihayot, Mirzo Ulug‘bek, Yashnobod, Olmazor, Uchtepa va Yunusobod tumanlarida jami 40 ta zamonaviy avtomobillarga yonilg‘i quyish shoxobchasi tashkil etiladi.

Loyihalar 10 yillik davlat-xususiy sheriklik asosida amalga oshirilishi belgilangan.

Shuningdek, qaror doirasida Olmazor va Chilonzor tumanlarida zamonaviy fudkort, sport maydonchalari hamda avtoturargohlarni o‘z ichiga olgan majmualarni barpo etish bo‘yicha loyihalar ham tasdiqlangan.

Mutasaddilarga mazkur obektlarni shaharsozlik normalari va amaldagi qonunchilik talablariga muvofiq amalga oshirilishini ta’minlash vazifasi yuklatildi.